મને યાદ છે ત્યાં સુધી, અમારા અતુલ – સુવિધા કોલોનીના ગરબામાં આ ગરબો હંમેશા ગવાતો.. લગભગ તો ભાનુમાસી અને મીનામાસી ગવડાવતા અને બાકીની માસીઓ અને અમે છોકરીઓ ઝીલતા..!
અહીં ગવાયેલા શબ્દો કરતા એ ગરબાના શબ્દો થોડા અલગ હતા, ‘માને મંદિરીયે…’ ને બદલે ‘સામેની પોળથી..’ એવા શબ્દો વપરાતા… પણ, એ સિવાય ઘણું બધું સરખું..!
.
ચપટી ભરી ચોખા ને ઘીનો છે દીવડો
શ્રીફળની જોડ લઈએ રે….
હાલો હાલો પાવાગઢ જઈએ રે… (2)
માને મંદિરીયે સુથારી આવે,
સુથારી આવે માના બાજોઠ લઈ આવે,
બાજોઠની જોડ લઈને રે… હાલો….
માને મંદિરીયે કસુંબી આવે,
કસુંબી આવે માની ચૂંદડી લઈ આવે,
ચૂંદડીની જોડ અમે લઈએ રે….. હાલો…
માને મંદિરીયે સોનીડો આવે,
સોનીડો આવે માના ઝાંઝર લઈ આવે,
ઝાંઝરની જોડ અમે લઈએ રે… હાલો….
માને મંદિરીયે માળીડો આવે,
માળીડો આવે, માના ગજરા લઈ આવે,
ગજરાની જોડ અમે લઈએ રે…. હાલો….
માને મંદિરીયે ઘાંચીડો આવે,
ઘાંચીડો આવે માના દીવડાં લઈ આવે,
દીવડાની જોડ અમે લઈએ રે…. હાલો….
