મેકઅપ વિના જ મારી કને આવ, જિંદગી !
સાદું સીધું જ, મારી કને લાવ, જિંદગી !
ચહેરો બદલ ન તું, કે ન પડદો તું પાડી દે,
ઓળખ છુપાવી આમ, ના બનાવ, જિંદગી !
જાળું કરોળિયો કોઇ જાતે બનાવે એમ,
ગૂંથી ભરમની જાળ, ના ફસાવ, જિંદગી !
જળને ન ઝાંઝવું કહે, ન ઝાંઝવાને જળ,
દઇ વ્યર્થ કલ્પના તું ના સતાવ, જિંદગી !
અર્થહીન દોડતાં થાકી ગયો સતત,
માયાહરણ મને તું ના બતાવ, જિંદગી !
————-
વ્હાલા ગુજરાતીઓ…
સૌ પ્રથમ તો સૌને ‘ગુજરાત દિન’ની હાર્દિક શુભેચ્છાઓ.. અને આજના આ ખાસ દિવસે આપણી સાથે ગુજરાતની થોડી વાતો અને ગુજરાતના ગૌરવવંતા ગીતો લઇને હાજર છે દેશગુજરાત.કોમ ના જપન પાઠક. જપનની ઓળખાણ આપવા હું એટલું જ કહીશ, કે એકવાર દેશગુજરાત.કોમની મુલાકાત જરૂર લેશો. ‘Ahmedabad is changing’ નો episod હોય કે પછી વર્ષો પહેલાના વાઘ ‘બળેલો’ની વાતો, કે પછી શરદપૂનમની વાતો, જપનને સાંભળવાનો જેટલી વાર લ્હાવો મળે, ચુકવા જેવો નથી.
તો આજે હવે હું તમારો વધુ સમય નહીં લઉં, સાંભળો : જપન પાઠક અને એમની વાતો, સાથે સાથે આપણા ગીતો તો ખરા જ.
.
અને હા, ‘ગુજરાત દિન’ નો આ ઉત્સવ આપણે કાલે પણ ઉજવશું, કારણ કે કાલે ટહુકો પર નવી પોસ્ટ મુકવાના સમયે અહીં અમેરિકામાં 1 લી મે થઇ હશે. એટલે કાલે સાંભળશું, જેને હું ગર્વથી ‘ગુજરાતનું ગૌરવ’ કહું છું, એવા આપણા મેહુલભાઇએ સંગીતબધ્ધ કરેલ ગીત ‘ગુણવંતી ગુજરાત…’. એમના આલ્બમ ‘પ્રેમ શોર્ય ગુજરાત’નું આ મારું સૌથી ગમતું ગીત.
જપને જે ગુજરાતપ્રેમને લગતા ગીતોના આલ્બમની વાત કરી ને, એના વિષે એક વાત કહું? 1 મે, 2004 ના દિવસે, ગુજરાતને ચાહતા, અને ગુજરાતી સાંભળતા અદના ગુજરાતીને અર્પણ એવું આલ્બમ ‘મેહુલ સુરતી’ એ બહાર પાડ્યું હતુ, ‘પ્રેમ શોર્ય ગુજરાત’. (આજનું શિર્ષક પણ મેહુલભાઇના જ શબ્દો છે). મને આશા છે કે ઘીમે ઘીમે આ આલ્બમ વિષેની જાગૃતતા વધે, અને દેશભક્તિના હિન્દી ગીતો જેટલા પ્રચલિત છે, એટલા જ આ બધા ગીતો પણ પ્રચલિત અને સરળતાથી ઉપલબ્ધ બને.
પણ એની વધુ વાત કરીશું આવતી કાલે. આજે તો બસ આટલું જ કહીશ.
જય જય જન્મ સફળ ગુજરાતી….. જય જય ધન્ય અદલ ગુજરાત……
જય ગુજરાત.
( ટહુકો.કોમના મુલાકાતીઓ તરફથી અને મારા તરફથી પણ, મિત્ર જપન પાઠકનો હ્રદયપૂર્વક આભાર.)
Jay jay garavi Gujarat, jai jai garvi Gujarat, Gujarat din special songs, listen online gujarati music, japan pathak jyan jyan vase ek gujarati , sadakaal gujarat
જે મસ્તી હોય આંખોમાં સુરાલયમાં નથી હોતી
અમીરી કોઈ અંતરની મહાલયમાં નથી હોતી
શીતળતા પામવાને માનવી તું દોટ કાં મૂકે?
જે માની ગોદમાં છે એ હિમાલયમાં નથી હોતી
Muktak, suren thakkar mehul, tahuko.com – listen Gujarati music online
પૂર્ણ થઇ શીતલ રજની, ને શુષ્ક નિયમનો અંત જડ્યો,
વનવનમાં ઉત્સવ કરવા, મદમસ્ત રજાનો ઘંટ પડ્યો,
ને છુટ્યો વાયરો દક્ષિણથી, કિલ્લોલ કરતો આજે
ડોલ્યા તરુવરને ડોલી વલ્લરી, નવ પલ્લવથી સાજે
ઉદય મઝુમદાર અને રેખા ત્રિવેદીના સ્વરમાં આ શબ્દો સાથે જ્યારે આ ગીત શરુ થાય છે, ત્યારે કોઇ પણ ઋતુમાં વસંતનું વાતાવરણ ઉભુ કરી દે છે. જેટલીવાર સાંભળો, એટલીવાર વધુ ને વધુ ગમી જાય એવું સુંદર ગીત.
કોઇ ગીત તમને એના શબ્દોને લીધે ગમી જાય, કોઇ એના સંગીત કે પછી કોઇ ગાયકીને લીધે. પણ આ ગીત માટે એક વાત જરૂર કહીશ, આટલીવાર સાંભળવા છતાં હું એ નક્કી નથી કરી શકી કે મને આ ત્રણમાંથી સૌથી વધુ શું ગમી ગયું !
શબ્દોની જ વાત કરું, તો આ ગીતની દરેકે દરેક કડીમાં કવિએ વસંતને એવી અલગ અલગ ઉપમાઓ આપી છે કે કવિની કલ્પનાને સલામ કર્યે જ છુટકો. પછી એ કરિયાવરના લીલા પટોળા હોય, ભીક્ષા માંગતા ભમરાનો ગુન ગુન કરતો એકતારો, કે રાત-દિવસનો ગરબો. વસંતનો ઉત્સવ ઉજવતા માનસપટલ પર દરેક કડી એક અલગ જ ચિત્ર ઉભું કરી દે…. આનંદકેરી લહેરે આપણે પણ ઝુમી ઉઠીયે…..
Semi-classical જેને કહી શકાય, એવું આ ગીતનું સંગીત પણ એટલું જ કર્ણપ્રિય છે. રાગનું નામ તો નથી ખબર, પણ ગાવાનું મન થઇ જાય એટલો સરસ રાગ છે ગીતનો, અને આખા ગીતમાં વાગતા તબલા અને ખંજરી ખાસ ધ્યાન ખેંચે છે. ‘નાચે છે નટરાજ નચાવી…. આ કડી પછી જે ફક્ત તબલા વાગે છે, એ સાંભળીને તો જાણે આપણને નાચવાનું મન થઇ જાય…
અને ઉદય મઝુમદાર – રેખા ત્રિવેદીની જોડીનો કંઠ પણ એટલું જ ધ્યાન આકર્ષે છે. બે ગાયકો વચ્ચે જયારે આવો સરસ તાલ-મેલ ( આ ગુજરાતી શબ્દ છે ? ) હોય, ત્યારે એક Duet ગીતની મજા જ નીરાળી હોય છે.
ગીત – સંગીત : નીનુ મઝુમદાર
સ્વર : ઉદય મઝુમદાર, રેખા ત્રિવેદી
.
આનંદ કેરી લહેરે જાણે હસી ઉઠ્યો કિરતાર
વેર્યાં ફુલડાં અપરંપાર
ઘેલી વસંત આવી રે.. ઘેલી વસંત આવી રે…
…. આનંદ કેરી લહેરે..
ધરતી માં ની લાડકડીની થઇ ચોમેર વધાઇ
કરિયાવરના લીલા પટોળા રહ્યા બધે પથરાઇ
પંખીડાની સ્વાગત રાગે ગુંજી ઉઠી શરણાઇ
ટહુકે કોયલ સૂર લગાવી,
ઘેલી વસંત આવી રે…
…. આનંદ કેરી લહેરે..
ભીક્ષા યાચે ફુલડે ફુલડે ફરીને ભમરો ન્યારો
પાંખે વાગે ભિખારી કેરો ગુન ગુન ગુન એકતારો
દેતી જ્યાં ત્યાં પાનપાનમાં મસ્તીનો તડકારો
એવું દાન અનેરું લાવી,
ઘેલી વસંત આવી રે…
…. આનંદ કેરી લહેરે..
મધુર એને પગલે પગલે ગુંજે રુમઝુમ ભાષા
સુણી સુતેલા અંતર જાગે છુપી અનોખી આશા
સર્જનહાર ઉમંગે આજે રંગીન રચે તમાશા
નાચે છે નટરાજ નચાવી
ઘેલી વસંત આવી રે…
…. આનંદ કેરી લહેરે..
ગરબો લેતા ઘમ્મર ઘુમે રાત દિવસ રઢિયાળા
વર્ષ તણી પટરાણી કાજે સુંદર ગુંથે માળા
જીવન સાગરમાં છલકાતા રસના ધોધ રૂપાળા
આજ નિરંતર ઉર બહાવી
ઘેલી વસંત આવી રે.. ઘેલી વસંત આવી રે…
આનંદ કેરી લહેરે જાણે હસી ઉઠ્યો કિરતાર
વેર્યાં ફુલડાં અપરંપાર
ઘેલી વસંત આવી રે.. ઘેલી વસંત આવી રે…
આપણા ગુજરાતમાં તો વસંત ઋતુ ક્યારની આવી ને ગઇ… પણ આ વખતે અહીં અમેરિકામાં મોડી મોડી હજુ હમણા જ વસંત આવી છે. ( જો કે મારા કેલિફોર્નિયામાં તો એ પણ કંઇ એટલું જણાતુ નથી. ) વસંતની પધરામણીનું એક ખુબ જ સુંદર ગીત આવતી કાલે… પણ આજે વાંચીયે જયંત પાઠકની આ કવિતા. લાગે છે કે આવા જ કોઇ પ્રેમીની ફરિયાદ ઉપરવાળાએ સાંભળી લીધી હશે 🙂
પણ હા, એક વાત જરૂર કહીશ… નાની અમથી, પણ તરત જ ગમી જાય એવી સુંદર કવિતા.
આવતી રોકો વસંતને
મારે આંગણિયે ફુલડાંના ફાલ
લાવતી રોકો વસંતને
એ તો આંગણને આંબલિયે ટહુકો કરે,
અહીં એકલડું ઉર મારું હીબકાં ભરે.
કોઇ હેતસૂના હૈયાની ડાળ
હલાવતી રોકો વસંતને.
શાને શીળો સમીર બની અંગે અડે !
મારા ઝૂરતા જીવન સાથ રંગે ચડે !
એની વેણુંમાં વેદનાનું વ્હાલ
વહાવતી રોકો વસંતને.
જે વાત કહેવી છે શબ્દોથી જીરવાય નહીં
પરિસ્થિતિ વિષે ચૂપ પણ રહી શકાય નહીં
રહે છે કોણ આ દર્પણના આવરણ નીચે,
હું રોજ જોઉં છું તો પણ એ ઓળખાય નહીં
નથી જગા હવે આગળ કદમ ઉઠાવાની,
ને આ તરફ હવે પાછા ફરી શકાય નહીં.
યુગોની આંખમાં એ ખૂંચશે કણી થઇને,
હવે એ ક્ષણને નિવારીય પણ શકાય નહીં.
નથી તિરાડ કોઇ કે હવા પ્રવેશી શકે,
અને છતાંય અહીં શ્વાસ ગૂંગળાય નહીં.
તું બોલે તો બોલું એવી મનમાં વાળી ગાંઠ,
બંધ હોઠ કર્યા મેં જ્યારે, – આંખે માંડી વાત !
આંખોને યે વારું ત્યારે, – જોવુ ના તુજ દિશ
એમ કર્યું તો, – સ્મરણો તારાં મનમાં કરતાં ભીંસ
તેને વારું, ને તુજ દિશનું ખાળું અંતરવ્હેણ,
– નીર ફર્યા એ પાછાં તેથી ઊભરાતાં તુજ નેન
અંતર મારે ભય જાગે : શું બંઘો જાશે તુટી ?
શબ્દો, આંખો, અંતર, દેશે નિજનું તુજને, લૂંટી ?
– સઘળું નિજનું તુજને લૂંટી ?
અરે,
આમ નજર ના ફેરવી લેવાથી
પાસેનું હોય તેને
થોડું જ પરાયું બનાવી શકાય છે ?
એવુ ખરું કે
હું ઘડીક હોઉં
ઘડીક ન યે હોઉં
પણ ઘડીકમાં ચોરપગલે તારી શય્યામાં સળ થઇ બેસી જાઉં
કે તારા કંઠમાં ધીમું ધીમું ગીત બની આવી ચડું
કે નીંદરની જેમ ઊડી યે જાઉં…
હું કોઇ નક્કી નહીં હોઉં.
તારા પુસ્તકનું સત્યાવીશમું પાનું હોઇશ
તું ચાલે તે રસ્તે હોઇશ.
તારા ખુલ્લા કેશમાં ફરતી હવા હોઇશ
ક્યારેક રીંસે ભરાઉં તો
તું મને સંભારે પણ હું તો તારી યાદમાં જ ન આવું
છબીમાં હોઉં પણ તારી સામે ન જ હસું.
ક્યારેક જૂની પેટીમાં છુપાવેલ મારો કોઇ પત્ર બની
હું અચાનક જડું ને તને રડાવી ય દઉં, હું…
પણ અંતે તો સોનલ,
તું છે કેલિડોસ્કોપ
અને હું છું તારું બદલાતું દ્રશ્ય.
આપણે અરસપરસ છીએ.
તારા સ્તનનો ગૌર વળાંક હું છું,
તારી હથેળીમાં ભાગ્યની રેખા હું છું,
તારા અરીસામાં દેખાતું પ્રતિબિંબ હું છું.
હઠીલો છું.
તારી સકળ સુંદરતા બની તને ભેટી જ પડ્યો છું –
તારું સકળ સોનલપણું જ હું છું, લે…
અને તારે મારો ઇનકાર કરવો છે ?
એ પ્રયત્ન કરી જો.
દરિયા વચ્ચે બેસીને કોઇ દરિયાનો ઇનકાર કરે
તો દરિયો દરિયો મટી જાય છે ?
તને હું બહું કનડું છું, કેમ ?
શું કરું ?
પ્રેમ સિવાય મારા માટે બધ્ધું જ દુષ્કર છે –
તું જ કહે,
તને ન ચાહું તો હું શું કરું ?
આપણે એક જાળમાં સપડાયેલાં બે માછલાં છીએ ?
એક શરીરની બે આંખ છીએ ?
મને તો ખબર જ પડતી નથી.
એક વાર તું જ કહેતી હતી કે
તું દરિયો છે ને હું તારું પાણી છું
તું આકાશ છે ને હું તારો વિસ્તાર છું.
આ તું અને હું ના ટંટા પણ શા માટે ?
અરે… રે
તું સાવ બુદ્ધુ જ રહી.
આંખો મીંચીને રમીએ એને સંતાકૂકડી કહેવાય
કંઇ ‘જુદાઇ’ ન કહેવાય.
ચાલ, ઇટ્ટાકિટ્ટા છોડ,
અને કહી દે કે, હું હારી…
સુરતના હોબી સેંટર (the play group nursery) દ્વારા બહાર પડાયેલું બાળગીતોનું આલ્બમ હસતા રમતા, બાળકોની સાથે સાથે મોટેરાને પણ હસતા અને રમતા ( કે પછી રમવાનું મન થઇ જઇ એવા) કરી દે એવું છે… ઇટ્ટા કિટ્ટા (Click to listen the full song) ગીતની સાથે બાળપણમાં થતા ભાઇ-બહેનના રોજના એ મીઠા મીઠા ઝગડાઓ યાદ આવે, તો ટન ટન ટન બેલ પડ્યો સાંભળીને પોતાની સ્કુલના દિવસો યાદ આવી જાય… ‘અંગ્રેજીની લ્હાય’ સાંભળીને ય હસવું આવી જાય, પણ કંઇક અંશે એ સાચી વાત છે…
બાળકોની રસવૃતિને અનુકુળ સરળ શબ્દો અને મોર્ડન સંગીત સાથેના 12 અલગ અલગ ગીતો સાથેના આ આબ્લમનું રેકોડિંગ મેહુલ સુરતીના ‘સોંગબર્ડ સ્ટુડિયો’માં થયું છે, જેનું વિમોચન 8મી માર્ચ, 2007 ના દિવસે થયું.
અહીં હસતા રમતાના થોડા ગીતોની એક ઝલક આપું છું, મને ખાત્રી છે કે નાના-મોટા બધ્ધા બાળકો (!)ને આ ગીતો જરૂર ગમશે.
પંડિત ચાલ્યા જાય છે…
પગમાં જુના જુતા પહેરી પંડિત ચાલ્યા જાય છે
————————
ચાલો ઝટ ઝટ છતરી ઉઘાડો
વર્ષાની રાણી આવી….
વર્ષાની રાણી.. ટપ ટપ ટપ ટપ ટપ…..
——————————-
આ અમારો બચુડો અંગ્રેજી ભણવા જાય
કહે કદી એ હાય…
કહે કદી ગુડબાય…
કોની આગળ જઇને કહીએ અંગેજીની લ્હાય
———————————-
ટન ટન ટન ટન બેલ પડ્યો ને સ્કુલમાં થઇ ગઇ છુટ્ટી
ભારી દફતર ખભે મુકીને મેં તો દોટ મુકી
———————————-
તમારે આ આલ્બમ ખરીદવું હોય, તો નીચે આપેલા કોઇ પણ ઇમેઇલ પર કે ફોન પર સંપર્ક કરી શકો છો.
For Inquiries in USA :
Monal Sonecha : mailto:sonechamd@yahoo.com
For Inquiries Outside USA :
Rupang Khansaheb : mailto:rupangkhansaheb@gmail.com
Phone : +91 9825115852
તમે અમદાવાદ રહેતા હો કે આમ્સ્ટરડેમ, અથવા તો લંડન કે લોસ એંજેલેસ હો, બાળક અંગ્રેજી માધ્યમમાં ભણતુ હોય એ ખુબ જ સામાન્ય છે. અને જ્યારે એ બચ્ચાઓ ટ્વિંકલ ટ્વિંકલ કરતા હોય, ત્યારે સહેજે ગુજરાતી માધ્યમમાં ભણેલા મા-બાપને કે દાદા-દાદીને પોતે ગાતા હશે એ ગુજરાતી બાળગીતો પણ યાદ આવતા હશે.
જો તમને ય ઇચ્છા હોય કે ઘરના બાળકો અંગ્રેજી અને હિન્દી (ફિલ્મના) ગીતોની સાથે ગુજરાતીમાં ગીતો ગાતા અને સાંભળતા થાય, તો સુરતના ‘હોબી સેંટર’ (the play group nursery)નું નજરાણું ‘હસતા રમતા’ – બાળગીતોની સીડી અચુક સાંભળજો… અને બાળકોને સંભળાવજો. (એક ખાનગી વાત કહું? બાળકોની સાથે સાથે કોઇ પણ ઉંમરની વ્યકિતને સાંભળવા ગમે, એવા છે આ બાળગીતો 🙂 )
( ‘હસતા રમતા’ ના બીજા થોડા ગીતો અહીં સાંભળો )
સ્વર : ઐશ્વર્યા હીરાની, સુપલ તલાટી
Composer : મોનલ શાહ
Music Arranger & Recording : મેહુલ સુરતી
.
કિટ્ટા કિટ્ટા…. કિટ્ટા…
કિટ્ટા કિટ્ટા…. કિટ્ટા…
કનુ :
ઇલા તારી કિટ્ટા…
ઇલા:
કનુ તારી કિટ્ટા…
ઇલા:
મારી પાસે મીઠી મીઠી શેરડી ને સિંગો
લે હવે તું લેતો જા હું આપું તને ડીંગો
કનુ :
મારી પાસે ખાટી મીઠી આંબલી ને બોર
એકે નહીં આપુ તને છો ને કરે શોર
ઇલા:
જાણે હું તો આંબલી ને બોર નો તુ ઠળીયો
ભોગ લાગ્યા ભાગ્યના કે ભાઇ આવો મળીયો
કનુ :
બોલી બોલી વળી જાય જીભના છો કુચ્ચા
હવે કદી કરું નહી તારી સાથે બુચ્ચા
ઇલા:
જા જા હવે લુચ્ચા….
ઇટ્ટા અને કિટ્ટાની વાત અલ્યા છોડ
ભાઇ બહેન કેરી ક્યાં જોઇ એવી જોડ
