ટહુકો ફાઉન્ડેશનના કાર્યક્રમ સુર શબ્દની પાંખેમાં દર્શના ભૂતા શુક્લના સ્વરમાં સાંભળો.

સંગીત નિર્દેશક : દિલીપ ધોળકિયા

પગલું પગલાંમાં અટવાણું
પગલું પગલાંમાં અટવાણું
કે મનખો રમતો ચલક ચલાણું

કાંસાને અફળાવી બેઠી
એક સોનાની મેખ
કોની લેખણ લેખ લખી ગઇ
કોણે લીધાં ભેખ
ગળ્યું છે ગોળ વિના ગરમાણું

તનના પગલાં તો ધરતી પર
પાડે એની છાપ
મનના પગલાંની માયાનું
મનડું જાણે પાપ
ભટકતાં ભવ મારગ ભરમાણું

સાત સાત સાચાં પગલાંને
ખોટું પગલું એક
સાત સાત આ જનમારામાં
અધવચ ખુટી ભેક
ઉકલશે ક્યાંથી હવે ઉખાણું

-વેણીભાઈ પુરોહિત

ધ્રુવ ગીત ચેનલ ઉપર નવું ગીત માણો!

સ્વર : જનમેજય વૈદ્ય

.

બાર બાય બાર જેવી બાથરૂમો હોય ને પચ્ચી બાય ચોવીના ઓરડા
એવી મોટી મહેલાતુંને ટક્કર મારે તે મારા ચાર પાંચ નળિયાના ખોરડાં

ખોરડાંને આડ નહીં ફરતે દિવાલ નહીં નજરૂંની આડે નહીં જાળીયું
તક્તીમાં નામ જેવી ખોટી જંજાળ નહીં ચોપ્પન દિશામાં એની બારિયું
બંધન ગણો તો પણે આંબલીના ઝાડ હેઠ છોકરાએ ટાંગેલા દોરડા

ઘરમાં બેસું ને તોય સૂરજની શાખ દઇ ચાંદરણા તાળી લઇ જાય છે
કેમનું જીવાય કેવી રીતે મરાય એવી વાયરાઓ વાતો કહી જાય છે
એકવાર ફફડે છે હોઠ અને ગહેકે છે ભીંતે ચીતરેલ બધા મોરલા

-ધ્રુવ ભટ્ટ

સૌજન્ય:નીલા ટેલી ફિલ્મ્સ અને ધ્રુવગીત

ધ્રુવ ગીત ચેનલ ઉપર નવું ગીત માણો!

સંગીત તથા સ્વર : જન્મેજય વૈદ્ય

.

મારામાં આરપાર સાત સાત દરિયા ને દરિયામાં આરપાર તું
પળમાં પળ ગૂંથીને તું વારતા વણે ને એને જીવતરનું નામ દઉં હું

કાળમીંઢ પથ્થરનું ભૂરું પોલાણ મારી લાગણીથી હાથવેંત છેટું
વેદના તો હસતાંયે વેઠી લેવાય; આવા સુખને વેઠું તો કેમ વેઠું
આંખોનાં પોપચાંમાં સાચવી મૂક્યાં છે એને સપનાં કહું કે કહું શું
મારામાં આરપાર સાત સાત દરિયા ને દરિયામાં આરપાર તું

મુઠ્ઠી ભરીને વ્હાલ વ્હેંચતા રહો કે ભલે આપણી હથેળી હોય ખાલી
દરિયાને પૂછવાનું ટાળજો કે, ભાઈ,તને ભરતી ગમે કે ઓટ વ્હાલી
પંખી તો કોઈનેય કહેતું નથી કે, એણે પીંછામાં સાચવ્યું છે શું
મારામાં આરપાર સાત સાત દરિયા ને દરિયામાં આરપાર તું.

-ધ્રુવ ભટ્ટ

સૌજન્ય:નીલા ટેલી ફિલ્મ્સ અને ધ્રુવગીત

સ્વર:કવિતા ચોક્સી

.

મને મમ્મી લાગે વહાલી હું તો ભાષા બોલું કાલી
મને પપ્પા લાગે વ્હાલાં એ તો મારી પાછળ ઘેલાં

વાતે વાતે મમ્મી વઢે તોય લાગે ખાટી મીઠી
પપ્પા પાડે ચીસો મોટી તોય ગમે દોસ્તી એની

મારા મમ્મી પપ્પાનો હું લાડકવાયો દીકરો
ઘડપણની લાકડી કાયમનો સથવારો

મમ્મીના હાલરડાંનો હું જ રાજા
પપ્પાના સપનાનો હું જ બાદશાહ

સ્વર અને સ્વરાંકન : જીજ્ઞેશ કોટડીયા

.

તમે કદાચિત ભૂલી ગયા છો, કદી આપણે કાગળ ઉપર,
ચિતર્યું’તું જળ ખળખળ વહેતું, ને તરતી મૂકી’તી હોડી;
સ્થિર ઊભેલી તે હોડીને તરતી કરવા, સરસર સરવા,
ઝરમર ઝરમર સાદ લઈને મારે તમને મળવું છે.

ફૂલ ઝરંતો હાથ લઈને, ઝાકળ જેવી જાત લઈને,
સૂરજની એક વાત લઈને મારે તમને મળવું છે !
સાંજ ઢળ્યા-ની ‘હાશ’ લઈને, ઝલમલતો અજવાસ લઈને,
કોરાં સપના સાત લઈને મારે તમને મળવું છે.

ખોજ તમારી કરતાં કરતાં થાક્યો છું હું, પાક્યો છું હું,
પગમાંથી પગલું થઈ જઈને વિખરાયો કે વ્યાપ્યો છું હું;
જ્યાં અટવાયો જ્યાં રઘવાયો, તે સઘળા મારગ ને
મારગનો એ સઘળો થાક લઈને મારે તમને મળવું છે.

ક્યારેક તો ‘હું’ને છોડી દો, ભીતરની ભીંતો તોડી દો,
બંધ કમાડ જરા ખોલી દો, એકવાર તો ‘હા’ બોલી દો;
‘હા’ બોલો તો હાથમાં થોડા ચાંદલીયા ને તારલીયાની
ઝગમગતી સોગાત લઈને મારે તમને મળવું છે.
– રિષભ મહેતા

વિશ્વ ચકલી દિવસ નિમિતે ,

સવાર આખી પાંખે પકડી
ચકલી ચીં ચીં ગાય
ઝાડે ઝાડે સૂરજ બેસે
ઝળહળ ઝળહળ થાય
ચકલી ચીં ચીં ચીં ચીં ગાય
ચકલી ચક ચક કરતી જાય… સવાર આખી…

ફરરર કરતી આવી બેસે
દાદાજીના ફોટા પર
વ્હાલી થઈ પપ્પાને પૂછે, 
અહીં બનાવું મારુ ઘર?
હસતી રમતી જાય
ચકલી ચીં ચીં કરતી જાય… સવાર આખી…

ફરરર કરતી આવી બેસે
દાદીમાની હિંડોળે,
હરખાતી હરખાતી કહેશે
ચકો ચડ્યો છે ઘોડે
કુદક કુદકતી જાય 
ચકલી ચીં ચીં કરતી જાય…સવાર આખી…

ફરરર કરતી રસોઈઘરમાં
આવી પહોંચે દોડી
મમ્મીને જઈ પૂછે એ તો
મદદ કરુ કંઈ થોડી?
લટક-મટકતી જાય
ચકલી ચીં ચીં કરતી જાય…સવાર આખી…

ફરરર કરતી આવી એ તો
લઈ લે મારી પાટી-પેન
‘સ્પેરો’ નો સ્પેલિંગ એ પૂછે
લાગે મારી નાની બેન
ઝટપટ લખતી જાય, 

ચકલી ચીં ચીં કરતી જાય.. સવાર આખી..

તમે જો જો ના વાયદા વિતાવજો,
પિયું પહેલી પેસેન્જરમાં આવજો.

સિલ્કની કીનાર કેરાં વાયલ આછેરાં,
કોઇક નવા નાટકનાં પચ્ચાઓ પેર્યા,
થોડા હૅન્ડબિલ હેરઓઇલ તણાં લાવજો,
પિયું પહેલી પેસેન્જરમાં આવજો.

એક હારમોનિયમ,એક હારમોનિયમ,
એક હારમોનિયમ, પૅરિસનું લાવજો,
આવવાનો તાર મને આગળ મોકલાવજો,
તમે સામા સ્ટેશન પર સીધાવજો.
-પ્રભુલાલ દ્વિવેદી