ચોરી કરવા ચાલ્યાં ચોર, સોની પોળમાં થાતો શોર
સિપાહી મળ્યાં સામા, બાના ભાઈ તે મામા

મામા લાવે છુક છુક ગાડી, બાને માટે લાવે સાડી
સાડીનાં રંગ પાકા, બાપનાં ભાઈ તે કાકા

કાકા કાકા કારેલાં, કાકીએ વઘારેલા
કાકી પડ્યાં રોઈ, બાપની બહેન તે ફોઇ

ફોઇ ફૂલડાં લાવે, ફૂઆને વધાવે
ફૂઆ ગયાં કાશી, બાની બહેન તે માસી

સ્વર:કવિતા ચોક્સી

.

મને મમ્મી લાગે વહાલી હું તો ભાષા બોલું કાલી
મને પપ્પા લાગે વ્હાલાં એ તો મારી પાછળ ઘેલાં

વાતે વાતે મમ્મી વઢે તોય લાગે ખાટી મીઠી
પપ્પા પાડે ચીસો મોટી તોય ગમે દોસ્તી એની

મારા મમ્મી પપ્પાનો હું લાડકવાયો દીકરો
ઘડપણની લાકડી કાયમનો સથવારો

મમ્મીના હાલરડાંનો હું જ રાજા
પપ્પાના સપનાનો હું જ બાદશાહ

વિશ્વ ચકલી દિવસ નિમિતે ,

સવાર આખી પાંખે પકડી
ચકલી ચીં ચીં ગાય
ઝાડે ઝાડે સૂરજ બેસે
ઝળહળ ઝળહળ થાય
ચકલી ચીં ચીં ચીં ચીં ગાય
ચકલી ચક ચક કરતી જાય… સવાર આખી…

ફરરર કરતી આવી બેસે
દાદાજીના ફોટા પર
વ્હાલી થઈ પપ્પાને પૂછે, 
અહીં બનાવું મારુ ઘર?
હસતી રમતી જાય
ચકલી ચીં ચીં કરતી જાય… સવાર આખી…

ફરરર કરતી આવી બેસે
દાદીમાની હિંડોળે,
હરખાતી હરખાતી કહેશે
ચકો ચડ્યો છે ઘોડે
કુદક કુદકતી જાય 
ચકલી ચીં ચીં કરતી જાય…સવાર આખી…

ફરરર કરતી રસોઈઘરમાં
આવી પહોંચે દોડી
મમ્મીને જઈ પૂછે એ તો
મદદ કરુ કંઈ થોડી?
લટક-મટકતી જાય
ચકલી ચીં ચીં કરતી જાય…સવાર આખી…

ફરરર કરતી આવી એ તો
લઈ લે મારી પાટી-પેન
‘સ્પેરો’ નો સ્પેલિંગ એ પૂછે
લાગે મારી નાની બેન
ઝટપટ લખતી જાય, 

ચકલી ચીં ચીં કરતી જાય.. સવાર આખી..

સ્વરાંકન – શ્રી જયદેવ ભોજક .
સંગીત – ડો. પ્રભાતદેવ ભોજક .
સ્વર – ડો. પ્રભાતદેવ ભોજક અને નૂપુર મ્યુઝિક ક્લાસ, નડીઆદ

.

જંગલ કેરા પ્રાણીઓની છૂક છૂક ગાડી જાય,
સૌથી આગળ કાળો હાથી, એન્જિન એ કહેવાય,
ગાડી આવી ,ગાડી આવી, સ્ટેશન પર ગાડી આવી
પ્લેટફોર્મ ઉપર ગાડી આવી.

સિંહ અને વાઘ એના ડબ્બા થઇ જોડાય ,
ચિત્તો અને દીપડો પાછળ પાછળ જાય
જંગલ આખું ધમધમ થાતું પક્ષીઓ ગભરાય,
કાણી આંખે કાગડો એકલો, ગાડી જોતો જાય,
ગાડી આવી ….

હાથી ઉપર,સસલું બેઠું, ડ્રાઇવર એ કહેવાય,
મીઠાં મીઠાં ફળ તોડી હાથીને દેતું જાય,
લાંબી ડોકે જિરાફભાઈ ઊંચે જોતા જાય,
વરુ અને શિયાળ એના પગમાં અટવાઈ જાય,
ગાડી આવી ….

કોટ પહેરી વાંદરાભાઈ ડબ્બે ડબ્બે જાય,
પાંદડાની ટિકિટ તપાસે, ચેકર એ કહેવાય;
સૌની પાછળ ઝંડી લઈને રીંછભાઈ જાય;
પીપ-પીપ પીપ પીપ સીટી વગાડે , ગાર્ડ એ કહેવાય
ગાડી આવી…

– “બેજાન ” બહાદુરપુરી