સ્વર : કલ્યાણી કૌઠાળકર
સ્વરાંકન : હરિશ્વંદ્ર જોશી
આલબમ : સંગત
.
રાધા શોધે મોરપિચ્છ ને ,શ્યામ શોધતા ઝાંઝરિયા,
રાધિકાની આંખ જપે છે સાંવરિયા ! ઓ સાંવરિયા !
મુરલીના સૂર કદંબવૃક્ષે ચીર થઈને ઝૂલે,
અને શ્યામની આંખો જળમાં કમળ થઈને ખૂલે;
કુંજગલીમાં ધૂળ રેશમી તો ય કહે એ કાંકરિયા….
ઉજળો દિવસ શ્યામ થયો ને રાધિકા થઇ રાત,
યમુનાના જળ દર્પણ થઈને કરે હૃદયની વાત;
ભરી ભરીને ખાલી ખાલી કરતી ગોપી ગાગરિયા…
– સુરેશ દલાલ
સ્વર : આરતી મુન્શી
સ્વરાંકન : હરિશ્વંદ્ર જોશી
આલબમ : સંગત
.
આમ રોજે ઘેરાય, નહીં વરસે,
વરસાદ મારા વ્હાલમજી જેવો…
મને તરસાવી પોતે પણ તરસે,
વરસાદ મારા વ્હાલમજી જેવો…
કોરા રહે ને વળી જાતે હિજરાય એવા
બંને સ્વભાવથી છે સરખા,
મન મૂકી વરસે નહીં બેમાંથી કોઈ
મને લથબથ ભીંજ્યાના અભરખા;
એમ સમજાવ્યો સાનમાં ન સમજે,
વરસાદ મારા વ્હાલમજી જેવો…
મનના માનેલ અને આષાઢી છેલ,
હું તો કેમ કરી સમજાવું તમને?
ઓઢણીનું આછેરું ઈજન ન ઓળખો તો
લાજ્યું ન આવે કાંઈ અમને?
સાવ આઘે આઘેથી મને અડકે,
વરસાદ મારા વ્હાલમજી જેવો…
– તુષાર શુક્લ
સ્વર : હિમાલી વ્યાસ નાયક
સ્વરાંકન : હરિશ્વંદ્ર જોશી
આલબમ : સંગત
.
તું જરાક જો તો, અલી !
આ સાવ નવા નક્કોર કંચવે પડી ગઈ કરચલી.
ઘસી ઘસીને ચાંદો આઠે અંગ આજ હું ન્હાઈ,
વડલા હેઠે ડિલ લૂછતાં બની ગઈ વડવાઈ;
હું હવા વગર હલબલી !
ખરબચડા ધબકારે ધકધક છાતલડી છોલાઈ,
શરમ સમેટી પાલવડે હું પાંપણમાં સંતાઈ;
હું મટી ગઈ મખમલી !
કમળકટોરી લઈને અમથી સરવરિયે રોકાઈ,
પરપોટો પરપોટો રમતાં પરવાળે ખોવાઈ;
હું તળીયામાં છલછલી !
– વિનોદ જોશી
સ્વર : ઉપજ્ઞા પંડ્યા
સ્વરાંકન : હરિશ્વંદ્ર જોશી
આલબમ : સંગત
.
હવે બોલું તો કેમ કરી બોલું?
અંતરના તાર સહેજ ઝણકે ત્યાં જંતરને આવે રે ઝોલુ !
હવે બોલું તો કેમ કરી બોલું?
એક પછી એક ખસે હળવેથી પડદાઓ અચરજનો આવે ના પાર,
એવામાં ઉતરવું પાર હવે દોહ્યલું કે ચારે પ લાગે મઝધાર;
હું જ હવે દરિયો ને હું ઝવે હોળી કહો કેમ કરી સઢને હું ખોલું?
હવે બોલું તો કેમ કરી બોલું?
અંધારાં અજવાળાં આવે ને જાય કહો જોઉં તો કેમ કરી જોઉં?
રણની નદીઓની જેમ આંસુ સુકાય હવે કેમ કરી પ્રેમબેલ બોઉં?
આગળ કે પાછળ નહિ રસ્તાનું નામ અને સપનું જોવાનું અમોલું ?
હવે બોલું તો કેમ કરી બોલું?
– હર્ષદ ત્રિવેદી
આલબમ : હાલરડાં
સ્વર : લાલિત્ય મુન્શા
.
સંપૂર્ણ આલ્બમ:
બહેની તમે દેવના દીધેલ છો,
આવો ને અમર થઈને રહો………
તમે કાળજાની કોર છો,
આવો ને અમર થઈને રહો………
દેવે દીધાં રુપ લઈને આવ્યાં,
કેવાં કેવાં વરદાનો બેન, દુનિયા લાવ્યાં,
પ્રીતિને પારણે ઝૂલાવું, હૈયાને હેતે ઝૂલાવું
બહેની તારા હાલ રે ગાઉ………. બહેની
બહેની તમે ઘરદીવડી થઈને કંકુ પગલે આવ્યાં,
સર્જનહારની સમોવડી બનવાનાં નસીબ લાવ્યાં,
તમે પરદેશી પંખી છો, આજે મારે આંગણે આવ્યાં છો
કાલે બીજું આંગણું શોભાવશો
આવો ને અમર થઈને રહો……… બહેની
દુ:ખના દરિયા આવે તો બેની લડજો ભીડી હામ,
ભણીગણી અન્યાયની સામે ઉજળું રાખજો નામ,
બહેની તું શક્તિનો અવતાર, તારાં રુપ – ગુણનો નહિ પાર
તું સાચો દુનિયાનો આધાર ……… બહેની
આલબમ : હાલરડાં
સ્વર : લાલિત્ય મુન્શા
.
સંપૂર્ણ આલ્બમ:
સૂઈ જા રે તું સૂઈ જા
હેતે ઝૂલાવું તું સૂઈ જા …..
પૂનમના ચાંદ મુખડુ મલકે
દેખી અમારા હૈયા રે છલકે
પારણું ઝૂલાવું હાથ હલકે હલકે
સૂતી ના સૂતી ત્યાં તું જાગે પલકે …..
કુસુમ, કોકિલા કે કુમુદ, કેતકી
ઉષા, અંજના, અરુણી, આરતી
અનેકાનેક તારા નામ, હું ધારતી
ઓવારણા લઈને ઉતારુ, આરતી …..
ચંદનના કાષ્ટ કેરુ પારણું ઘડાવું
ફૂલોની વેલ કેરુ દોરડું ગુંથાવુ
ફૂલો કેરી સેજે હીંચકો હિંચાવું
ફૂલોની ફોરમનો વીંઝણો વીંઝાવું ….
આલબમ : હાલરડાં
સ્વર : લાલિત્ય મુન્શા
.
સંપૂર્ણ આલ્બમ:
સાવ રે સોનાનું મારું પારણિયું
ને ઘૂઘરી ના ઘમકારા, બાળા પોઢો ને
ચાર પાયે, ચાર પુતળિયું
ને મોરવાયે બે મોર, બાળ પોઢો ને
પોઢી જા રાજા મારી આંખોના નૂર
નીંદરડી કેમ તારી આંખોથી દૂર
માવડી સુવડાવે, તારું પરનું ઝૂલાવે
મ્હારા બાળાને નીંદરડી આવે રે…
શમણાંની નગરીમાં તારલાની પાર
પરીઓની પાંખો પર થઈને સવાર
વાટલડી જૂએ બધા તને સાદ કરે
તારા વિના ના કોઈથી રહેવાય રે…
આલબમ : હાલરડાં
સ્વર : લાલિત્ય મુન્શા
.
સંપૂર્ણ આલ્બમ:
ધીરા રે આજો મીઠા રે આજો
સોણલિયાં હો, ધીરા ધીરા આજો !…
ધીરી રે આજો મીઠી રે આજો
નીંદરડી હો, ધીરી ધીરી આજો!…
સોણલાંમા રામજીના રંગમાં
સોણલાંમા સીતાજીના સંગમાં
લાડકડી, તમે રંગાજો રંગમાં… સોણલિયાં…
વીરા રે મહાવીર જેવા થાજો
ગૌતમને ગાંધી જેવા થાજો
સતનાં ગુણ સદાયે ગાજો… સોણલિયાં…
બહેનાં તમે ઝાઝેરું ભણજો
વીરા તમે ઝાઝેરું ભણજો
ભણજોને ઝાઝેરું ગણજો… સોણલિયાં…
નીંદરડી આવી આવી આવી
સોણલિયાં હો લાવી લાવી લાવી
પાંપણને પારણિયે રેઝૂલાવી… સોણલિયાં…
આલબમ : હાલરડાં
સ્વર : લાલિત્ય મુન્શા
.
સંપૂર્ણ આલ્બમ:
ચંદનનું પારણું ઝૂલો રે ઝૂલાવું
સૂઈ જા મ્હારા લાલ હાલરડું ગાવું
હું તો ભલેને જાગું રે જાગું
તારે માટે મીઠી નીંદરડી માંગુ
પારણીયે હિંચોળુને ઘેલી હું થાઉં
મ્હારી વ્હાલપની મીઠી માયામાં
જુગ જુગ અમર રહો, માં ની છાયામાં
જોઈ જોઈ તને હું તો હરખાઉં
મારી તે આંખોનું, મોંઘેરું નૂર
બે કાંઠે છલકતું, મમતાનું પૂર
હાલરડું ગાઉં ને, વારીવારી જાઉં
આલબમ : હાલરડાં
સ્વર : લાલિત્ય મુન્શા
.
સંપૂર્ણ આલ્બમ:
વાહુલિયા હો, ધીરા રે ધીરા વાજો
મેહુલિયા હો ધીરા રે ધીરા ગાજો
પોઢ્યા છે બાળ મ્હારા પારણે
ઝબકી ના જાય તારે કારણે
ડરી ના જાય એ તો સોણલે
વાયરા હો મીઠાં રે મીઠાં વાજો…..
બહેની મ્હારી લહેરો સમુદ્રની
હળવે હાથે હીંચોળો નાવલડી
હિંચોળે જેવી બેટાની માવલડી
ચાંદલિયા હો ધીરા રે ધીરા રે ધાજો…..
રાતલડીના તેજ રૂપા વરણાં
બેનડીના વાન સોના વરણાં
લાડકવાયી સોહે છે નીંદરમાં
તારલિયા હો ધીરા રે ધીરા રે આજે…..
