પ્રભુ અંતર્યામી… અને અસત્યો માંહેથી.. આ બે કડીઓ તો ઘણી પ્રચલિત અને જાણીતી છે, પણ આજે રવિનભાઇ અને સાથીઓ પાસે આખું અષ્ટક સાંભળીએ… !! સાથે આપ સૌને દિવાળી અને નવા વર્ષની ખૂબ ખૂબ શુભેચ્છાઓ..!!
સૌ અદભૂતોમાં તુજ સ્વરૂપ અદભૂત નીરખું,
મહા જ્યોતિ જેવું નયન શશીને સૂર્ય સરખું,
દિશાઓ ગુફાઓ પૃથ્વી ઊંડું આકાશ ભરતો,
પ્રભો એ સૌથીએ પર પરમ હું દૂર ઊડતો. 2
પ્રભો તું આદિ છે શુચિ પુરૂષ પુરાણ તું જ છે,
તું સૃષ્ટિ ધારે છે, સૃજન પલટયે નાથ તું જ છે,
અમારા ધર્મોને અહર્નિશ ગોપાલ તું જ છે,
અપાપી પાપીનું શિવ સદન કલ્યાણ તું જ છે. 3
પિતા છે અકાકિ જડ સકળને ચેતન તણો,
ગુરૂ છે મોટો છે જનકૂળ તણો પૂજ્ય તું ઘણો,
ત્રણે લોકે દેવા નથી તું જે સમો અન્ય ન થશે,
વિભુરાયા તુંથી અધિક પછી તો કોણ જ હશે. 4
વસે બ્રહ્માંડોમાં, અમ ઉર વિષે વાસ વસતો,
તું આઘેમાં આઘે, પણ સમીપમાં નિત્ય હસતો,
નમું આત્મા ઢાળી, નમન લળતી દેહ નમજો,
નમું કોટિ વારે, વળી પ્રભુ નમસ્કાર જ હજો. 5
જ્યાં સુધી પહોંચે નજર,
ત્યાં સુધી બસ ઘાસનો વિસ્તાર છે;
ને પછી આકાશ કેરી
નીલરંગી ક્ષિતિજ કેરી ધાર છે.
પૃથ્વીના આનંદનાં સ્પંદન સમાં
તરણાં હલે છે વારવાર;
ના ખબર કે શા સંબંધે
સર્વ સંગે એહ, મારો પ્યાર છે.
એ હલે છે આવતાં ધીમો પવન,
થાય છે એવું જ મારા ચિત્તમાંહીયે ચલન.
જોઉં છું વહેલી સવારે એમને
ને ખુશીથી મહેક મહેકે છે મને.
ઝાકળેથી એ બધાંયે શોભતાં.
જોઈ આંસુ હર્ષ કેરાં આંખમાં આવી જતાં!
થાય છે મારી નજર જાણે હરણ
ને રહે છે ઠેકતી એ ઘાસમાં:
ના છબે છે એક પળ એના ચરણ.
સ્પર્શતો એને નહીં,
ને નજાકત તોય એની
અનુભવું છું મન મહીં !
ને બપોરે હેમ શા તડકા તણું
ને હરિત એવા ઘાસનું થાયે મિલન :
આભનું, ધરતી તણું, એ બેઉ માંહી,
લાગતું કે, મન મળ્યું;
જોઈને એ ક્યાંકથી મુજ દિલ મહીં
આનંદ કેરું મધ ગળ્યું!
સાંજવેળા તેજ, છાયા, ઘાસ, સૌ
સાથે મળીને ખેલતાં ;
સાદ પાડી ચિત્તને મારા ય, સંગે લઈ જતાં!
એમના એ ખેલને જોઈ રહું,
ને હર્ષપુલકિત થઈ જઉં,
પુલકને એ જોઈને લાગે મને
કે ઘાસ જુદે રંગ, મારે અંગ,
નાનું રૂપ લઇ વ્યાપી રહ્યું!
કેવી અહો! આ મન તણી છે સાધના,
(વા નેહની એને કહું આરાધના?)
કે જોઉં જેને બા’ર
તેને અંગમાં ને અંતરે હું અનુભવું!
રે સ્વપ્નમાં એ ઘાસનું એ ચહુદિશે
સુખદ એવું જોઉં છું હું ફરકવું.
પ્રહલાદ પારેખના બે કાવ્યો – ‘વિદાય’ અને ‘બનાવટી ફૂલોને’ નો શ્રી મધુસુદન કાપડિયાએ કરાવેલો આસ્વાદ
(કાવ્યના શબ્દો – વિડિયોની નીચે લખેલા છે). આપના પ્રતિભાવો અહીં નીચે આપેલા comment boxમાં લખી શકો છો.
વિદાય
કદી નહિ કહું, ‘મને જ સ્મરણે સદા રાખજે,
અને નયનપંથનું અવર વિશ્વ તું ત્યાગજે’ ;
પરંતુ ગગનાંગણે, અવનિમાં અને સિંધુમાં,
મળે અધિક જે તને મુજ થકી, ઉરે થાપજે.
પરસ્પર કરી કથા રજની ને દિનો ગાળિયા;
અનેક જગતો રચી સ્વપ્નમાં, વળી ભાંગિયાં.
કઠોર થઈને કદીક તુજ આંસુ જોયા કર્યાં;
કદીક તુજ ગોદ શીશ ધરી હીબકાં મેં ભર્યાં.
મળે અધિક ઊજળા દિન અને મીઠી રાતડી,
જજે સકલ તો ભૂલી રજનિ ને દિનો આપણાં ;
રચે સ્વપન ભવ્ય કો જગતનું બીજા સાથમાં,
ભલે વીસરજે પછી જગત આપણે જે ઘડ્યાં.
છતાંય સ્મરણે ચડી વિપળ એક જો હું લઉં,
ઉદાર તવ ઉરની પ્રથમથી ક્ષમા તો ચહું .
*******
બનાવટી ફુલોને
તમારે રંગો છે,
અને આકારો છે,
કલાકારે દીધો તમ સમીપ આંનંદકણ છે,
અને બાગોમાંનાં કુસુમ થકી લાંબું જીવન છે.
ઘરોની શોભામાં,
કદી અંબોડામાં,
રહો છો ત્યાં જોઈ ઘડીકભર હૈયું હરખતું,
પ્રશંસા કેરાં એ કદીક વળી વેણો ઊચરતું.
પરંતુ જાણ્યું છે,
કદી વા માણ્યું છે,
શશિનું, ભાનુંનું, ક્ષિતિજ પરથી ભવ્ય ઊગવું ?
વસંતે વાયુનું રસિક અડવું વા અનુભવ્યું?
ન જાણો નિંદું છું,
પરંતુ પૂછું છું :
તમારા હૈયાનાં ગહન મહીંયે આવું વસતું :
દિનાન્તે આજે તો સકલ નિજ આપી ઝરી જવું.
ગુજરાતી લિટરરી એકેડેમી અને Tahuko,com સંયુક્તપણે એક મહત્ત્વાકાંક્ષી પ્રયોગ શરૂ કરે છે. આશા છે કે સભ્યોને એ પસંદ પડશે અને સહુનો સહકાર સાંપડશે. મધુસૂદન કાપડિયા દર મહિને થોડાંક ઉત્તમ કાવ્યો પસંદ કરી એનો આસ્વાદ કરાવશે. શરૂઆત પ્રહલાદ પારેખનાં કાવ્યોથી થશે. આજ, અમે અંધારું શણગાર્યું, ઘાસ અને હું, બનાવટી ફૂલો અને વાતો. પછી ઉમાશંકર, રાજેન્દ્ર શાહ, કાન્ત, ન્હાનાલાલ, સુન્દરમ, શ્રીધરાણી, પ્રિયકાંત મણિયાર, બાલમુકુન્દ દવે, વગેરે, વગેરે કવિઓની રચનાઓનો આસ્વાદ કરાવવાની ઈચ્છા છે.
આ કાર્યક્રમનું video presentation નિર્ધારિત સમયે You Tube પર મુકવામાં આવશે. Live Recording અને Interactive આદાનપ્રદાન ભવિષ્યમાં કરવાનો ઈરાદો છે. આ કાર્યક્રમોની રજૂઆત નિ:શુલ્ક હશે. કાવ્યોની નકલ આસ્વાદ રજૂઆત પૂર્વે જોઈતી હોય (અને કાર્યક્રમ પૂરેપૂરો માણવા માટે એ જરૂરી છે) તો મધુસૂદનભાઇને આપનું E Mail address
madhu.kapadia38@gmail.com પર મોકલજો. અનિવાર્ય હોય તો 973-386-0616 નંબર પર ફોન કરજો.
આ કાર્યક્રમનું વીડિઓ સંકલન સુરેન્દ્ર કાપડિયાએ તૈયાર કર્યું છે. સુરેન્દ્રભાઈનું
E Mail address SURENKUMUD4448@Gmail.com છે. અનિવાર્ય હોય તો ફોન 909 599 9885 નંબર પર કરી શકો છો.
ગુજરાતી સાહિત્યની ચૂંટેલી કવિતાઓનો આસ્વાદ મધુસૂદનભાઈના અવાજમાં પ્રત્યક્ષ કચકડે જોવો રસિકો માટે એક લ્હાવો હશે. ચોક્કસ માણજો
આસ્વાદ માણ્યા પછી Comments માં આપનો અભિપ્રાય મોકલવાથી ભવિષ્યના આસ્વાદોમાં સુધારા વધારા કરવાની સૂઝ પડશે. .મધુસૂદનભાઈએ આસ્વાદ કરાવવા ખૂબ જ જહોમત ઉઠાવી છે.
ગુજરાતી લિટરરી એકેડેમી અને Tahuko.com આપ સૌના વતી મધુસૂદનભાઈ અને સુશીલાબેનનો હૃદયપૂર્વક આભાર માને છે.
ચાલો તો કરીએ ગમતાંનો ગુલાલ.
આસ્વાદક: મધુસૂદન કાપડિયા
સમય: દર મહિનાના ત્રીજા રવિવારે નવો આસ્વાદ રજુ થશે અને લગભગ એક કલાક જેટલો ચાલશે. આપની
અનુકૂળતા પ્રમાણે વહેલી તકે જોવા વિનંતી.
સ્થળ: આપનું PC કે Tablet કે Smart ફોન
તાજા કલમ ઃ સૌથી પ્રથમ કાર્યક્રમ, પ્રાસ્તાવિક અને આસ્વાદ, રવિવાર તા. 20 Sept. 2015 12:00 noon EST રજુ થશે.
Tahuko.com પર પણ એની link ઉપલબ્ધ હશે.
આ જ પ્રમાણે દર મહિનાના ત્રીજા રવિવારે નવા આસ્વાદની link ઉપલબ્ધ થશે. જરૂર જોજો, સાંભળજો અને માણજો.
તમારો પ્રતિભાવ ચોક્કસ મોકલજો. અમે આતુરતાથી એની રાહ જોઈશું.
