આ અડધો શનિવાર અને અડધો રવિવાર… આવું નવું વર્ષ આવે તો મારે પોસ્ટ ક્યારે મુકવી? એ ચક્કરમાં હું બીજું કંઇ સ્પેશિયલ નથી કરી રહી.. સાંભળો આ મઝાનું ગીત..! ગીતની ગંભીરબાજુને ધ્યાનમાં ન લેતા આ ગીત માણીએ અને નવા વર્ષને આવકારીએ..! 🙂

આમ પણ – આ ગીત જે આલ્બમમાંથી લીધું છે – એ ગુજરાતી.કોમ – આવતી કાલની ગુજરાતી કવિતાઓ અને ગીતો મઢ્યું આલ્બમ છે – હાથમાં આવે તો સાંભળવાનું ચૂકશો નહી..! 🙂

પ્રસ્તાવના: અંકિત ત્રિવેદી
સ્વર: ચંદુ મટ્ટાણી
આલ્બમ: ગુજરાતી.કોમ

[audio:Intro_Sudamana.mp3,Sudamana Faliyama.mp3]

છેક દ્વારિકાથી દોડતા આવી સુદામાએ ઉઘાડી નાખેલી ડેલી,
ફાટેલી આંખોએ દંગ થઈ જોઈ એનાં ફળિયામાં લેક્સસ પડેલી.

ફફડતાં હૈયે જ્યાં પગ દીધો ફ્લૅટમાં ત્યાં ફાગણની કોયલ સંભળાઇ,
સોફાઓ દેખીને સૂવા એ જાય ત્યાં આંગણીયા સ્વપનો વિસરાયે,
ઓચિંતા ઝબકીને જાગી જુએ, સૂટ-બૂટ સહેત ટાઇ વિંટેલી,
સુદામાનાં ફળિયામાં લેક્સસ પડેલી..

પંખા પલંગો કબાટોને જોઈ પછી ધીમેથી ફ્રિજને એ ખોલે,
ફ્રિજમાં કાનાને થિજેલો જોઈ ફોન ઉપાડી મોટેથી બોલે,
How Are You, ક્હાન? જરા busy છું યાર, જો આ ઑફિસની ફાઇલો પડેલી,
સુદામાનાં ફળિયામાં લેક્સસ પડેલી..

સનસેટ જોવાને બેઠા છે સાંજે એ ગાર્ડનનાં ઝૂલે કમ્પાઉન્ડમાં,
ફૅશનીયા છોકરાને ટોમીને લઈ હવે નીકળે છે રોજ રોજ રાઉન્ડમાં,
એના ચહેરે ગોગલ્સ, સહેજ દુખતા મસલ્સ, હોઠ વચ્ચે છે સિગરેટ નમેલી,
સુદામાનાં ફળિયામાં લેક્સસ પડેલી..

ગોળ ગોળ ખુરશીમાં ફરતા રહી, ઓલ્યા કૃષ્ણની સમૃદ્ધિ તાગે,
વૈભવની વચ્ચે છે એવા ચકચૂર એને દ્વારિકા દરિદ્ર સાવ લાગે,
પોતીકી સાહ્યબી તો દોમ દોમ ફૂટી ને દ્વારિકા તો દરિયે ડૂબેલી,
સુદામાનાં ફળિયામાં લેક્સસ પડેલી..

– પ્રવિણ ટાંક