જાદુ – ધ્રુવ ભટ્ટ

ચાલ સખી, પાંદડીમાં… અને એ ગીત મારા કહેવાય કઇ રીતે? કવિ ધ્રુવ ભટ્ટ ના બંને ગીતો મારા ખૂબ જ ગમતાં ગીત..! જેટલીવાર સાંભળો એટલીવાર કવિની કલમને દાદ આપવાનું મન થાય.. અને આ ગીતમાં કવિએ કુદરતના જાદુને પણ આબાદ રીતે કલમથકી ઉજાગર કર્યો છે..! ખરેખર, કુદરતના સૌંદર્યના દરેક રૂપને જોઇને એ નકરો જાદુ જ લાગે ને?

(નકરો જાદુ…. Top of Nevada Falls, Yosemite N.Park, Apr 09)

* * * * *

લોક કહે ડુંગર પર ઊગ્યાં છે ઝાડ,
મારાં ઝાડવાંમાં ડુંગર રમમાણ છે,
આખો યે દેશ સાવ વાદળ થઇ જાય
એવા નકરા જાદુનું આ કામ છે.

કાળા-જૂના પથ્થરમાં ઊભી તિરાડ સમી
આકરી વ્યથામાં સ્હેજ જોવું,
અંદર છે ઝરણાને રણઝણતું રાખવાને
આખાયે જંગલનું હોવું.
ક્યાંક કંઇક કોળે તો એક વાત જાણીએ કે
ધરતી તો ઊગવાનું જ્ઞાન છે.

આખો યે દેશ સાવ વાદળ થઇ જાય
એવા નકરા જાદુનું આ કામ છે.
લોક કહે ડુંગર પર ઊગ્યાં છે ઝાડ,
મારા ઝાડવામાં જંગલ રમમાણ છે.

મહુડા કે સાગડામાં આથમતા સૂરજથી
જંગલની વારતાઓ થાય નહીં;
રંગ-રૂપ, ગંધ-સ્વાદ, શબ્દ-ઢોલથાપ વિના
જંગલના ગીતો ગવાય નહીં.
જંગલ તો હાથ મૂકો છાતીએ ને
સાંભળી લો એવા થડકારનું નામ છે.

લોક કહે ડુંગર પર ઊગ્યાં છે ઝાડ,
મારાં ઝાડવાંમાં ડુંગર રમમાણ છે,
આખો યે દેશ સાવ વાદળ થઇ જાય
એવા નકરા જાદુનું આ કામ છે.

– ધ્રુવ ભટ્ટ

12 replies on “જાદુ – ધ્રુવ ભટ્ટ”

  1. ” ધરતી તો ઊગવાનું જ્ઞાન છે” – અદ્ભૂત

    ધુવ ભટ્ટનું ગદ્ય હોય કે પદ્ય બન્નેમાં ગજબની તાજગી અને આગવું પોત મહેસૂસ થયા વગર રહે નહીં.

  2. Neha Dhaval says:

    ધુવ ભટ્ટ મારા પ્રિય…. એમની કલમમાં જાદુ લાગે છે !!

    ખુબ સુન્દર….

    નેહા ધવલ

  3. sudhir patel says:

    જાદુ ભર્યું અનોખું ગીત!
    સુધીર પટેલ.

  4. sapana says:

    સરસ ગીત. પ્રકૃતિનુ જાદુ!!
    સપના

  5. સુંદર રચના…

  6. rajani tank says:

    hey man !!! good..very very good….

  7. Pinki says:

    જંગલ તો હાથ મૂકો છાતીએ ને
    સાંભળી લો એવા થડકારનું નામ છે.

    ધરતી તો ઊગવાનું જ્ઞાન છે.

    નકરા જાદુનું આ કામ છે……!!! વાહ … સરસ !!!

  8. ashalata says:

    સુદર રચના—–

  9. mukesh parikh says:

    લોક કહે ડુંગર પર ઊગ્યાં છે ઝાડ,
    મારા ઝાડવામાં જંગલ રમમાણ છે.

    વાહ, ખૂબ જ સુંદર..

    ‘મુકેશ’

  10. Rupal says:

    મને આ વ્યક્તિ નિ દરેક રચના ઓ બહુજ પ્રિય ચ્હે અતરપિ, તત્વમસિ , સમુદ્રન્તિકે , એક વર એમને વાચો પચ્હિ બિજુ કૈ બકિ રહ્તુ હોઇ તેમ લગે નહિ

  11. અદ્ભૂત, ધ્રુવ ભટ્ટનો લય ગીત સાથે એટલો તદ્રુપ બની જાય છે, જાણે કોઈ નિર્ઝરનો વલવલતો વલવાટ…

  12. Prof. K. J. Suvagiya says:

    જંગલ તો હાથ મૂકો છાતીએ ને
    સાંભળી લો એવા થડકારનું નામ છે.

    જંગલને પોતાનામાં જીવનાર માણસનું આ કામ છે.

Leave a Reply

Your email address will not be published. Required fields are marked *