જિન્દગી પસંદ – મકરંદ દવે

જિન્દગી પસંદ મને જિન્દગી પસંદ !
મોતની મજાક ભરી
મોજના મિજાજ ધરી
ખુશખુશાલ ખેલતી જવાંદિલી પસંદ !

નૌબનૌ સુગંધ મહીં
જાય જે અબંધ વહી
તાજગી ભરેલ એ તવંગરી પસંદ !
જિન્દગી પસંદ મને જિન્દગી પસંદ.

સલામ હો હિસાબને
કલમ અને કિતાબને
જમા-ઉધારને જલાવતી મજલ પસંદ !
જિન્દગી પસંદ મને જિન્દગી પસંદ.

ગુલબહારી મહેક સમી
એ હયાતી એક ગમી
ફોરમે રમી રહી ફનાગીરી પસંદ !
જિન્દગી પસંદ મને જિન્દગી પસંદ.

મોતની મજાક સમી
જિન્દગી પસંદ !

– મકરંદ દવે

ટહુકો.કોમ