સ્વરાંકનઃ મહેશ દવે
સ્વર: યુનુશ અને દેવેશ

.

આ અમારો બચુડો અંગ્રેજી ભણવા જાય
કહે કદી એ હાય, કદી કહે ગુડબાય
કોની આગળ જઈને કહીએ અંગ્રેજીની લ્હાય.

પોએટ્રી તું પટ પટ બોલે, દાદીનો દેસી કાન,
swan કહે તું હંસને, દાદી સમજે શ્વાન,
દહાડે દહાડે ત્રીજી પેઢી દુર જતી દેખાય.. આ અમારો બચુડો

મેઘધનુષી ગુર્જરભાષા કેટલાં એના રંગ.
દાદીમાની કહેવત સુણી દુનિયા આખી દંગ.
પણ અંગ્રેજીથી રંગી દીધું તે તો આખું સ્કાય.. આ અમારો બચુડો

તું અંગ્રેજી બોલે ત્યારે દાદાજી પણ ઝૂલે,
કેમ કરી ચાલે રે બચુડા ગુજરાતી જો ભૂલે,
ભલે હોઠે ઈંગ્લીશ, હૈયે ગુજરાતી સચવાય .. આ અમારો બચુડો

સ્વરાંકન: મહેશ દવે
સ્વર: મેહુલ અને વૃંદ

.

રંગ લ્યોને રંગ લ્યોને,
હોળીનો રંગ લ્યોને
જીવનને રંગે ભરી ધ્યોને,
શેરીમાં ફરતી’તી વાનરની ટોળી,
લઈને પિચકારી રંગ દે ઘોળી,
પેલા કાકા આવે છે, હોડીનું ઘેડિયું લાવે છે,
લાવો કાકા હોડીનું ઘેડિયું,
પીળોને, વાદળી, જાંબલી ને રાતો, રંગોનો મેળો એવો ભરાતો,
ભગાભાઈ આવે છે. હોડીનું ઘેડિયું લાવે છે,
લાવો ભાઈ હોડીનું ઘેડિયું,
રંગોની વસ્તીમાં રહેવું અમારે,આખો દિ’ મસ્તીમાં રહેવું અમારે,
મંજુમાસી આવે છે,
હોડીનું ઘેડિયું લાવે છે, લાવો માસી હોડીનું ઘેડિયું

સ્વર: રૂપાંગ ખાનસાહેબ અને વૃંદ
સ્વરાંકનઃ મહેશ દવે

.

ચાલો ઝટ ઝટ છત્રી ઉઘાડો
વર્ષાની રાણી આવી
વર્ષાની રાણી ટપ ટપ ટપ ટપ

પેલા પસાકાકા ગબડી જાય, પેલા જાડાકાકા લપસી જાય
લવજી ખેચાણો ભાણાજી ખેચાણો, ખેચાણો પોરબંદર પાણો
ચાલો ઝટ ઝટ છત્રી ઉઘાડો
વર્ષાની રાણી આવી
વર્ષાની રાણી ટપ ટપ ટપ ટપ

આકાશે ઘેરું ઘેરું વાદળ ગરજી જાય, વીજળી ચમકી જાય
અહિયાં પાણી ત્યાં તો પાણી, હું તો ડૂબી ડૂબી જાઉ
બાપ રે…

ચાલો ઝટ ઝટ છત્રી ઉઘાડો
વર્ષાની રાણી આવી
વર્ષાની રાણી ટપ ટપ ટપ ટપ