તું દુઃખ ખોટું બતાવે છે તો એ તારી સમસ્યા છે.
જૂઠાં અશ્રુ વહાવે છે તો એ તારી સમસ્યા છે.
હશે જો સ્થિર મન તારું થવાનું પાર નિશ્ચિત છે
ઘડીમાં ડગમગાવે છે તો એ તારી સમસ્યા છે.
સતત ચહેરા ઉપર મહોરાં લગાવીને કર્યું નાટક
જગત ઓળખ ભૂલાવે છે તો એ તારી સમસ્યા છે.
ખરે એ તારલાંની હોય છે કિંમત ઘડીભરની
લિસોટા જો બનાવે છે તો એ તારી સમસ્યા છે.
સમય જેવો નથી ડોક્ટર કોઈ તું છોડ એના પર
દવાના થર લગાવે છે તો એ તારી સમસ્યા છે.
હવા સામે સમર્પણભાવ દાખવવો પડે ક્યારેક
જો પાંખો ફડફડાવે છે તો એ તારી સમસ્યા છે.
~ હિમાંશુ પટેલ
