રચના: પિનાકીન ત્રિવેદી
સ્વરાંકન: ?
સ્વર: હરિહરન

તારી નજરથી જિંદગીનો રંગ ફરી ગયો,
ભવભવની આ મજલનો મારો ઢંગ ફરી ગયો.

ભટકી ભમીભમીને થાકી ગયો’તો ભારી,
આશા મૂકી દીધી’તી, હિંમત ગયો’તો હારી;
ભીતર ને બહાર જામી ઘનઘોર અંધિયારી,
ત્યાં તો વીજલ કડાકે સ્વારી પધારી તારી,
તારો આ ચમત્કાર મને દંગ કરી ગયો. — તારી

જ્યાં કાલિમા હતી ત્યાં શી લાલિમા છવાઈ!
મરુભોમ  જ્યાં હતી ત્યાં નંદનબહાર છાઈ!
જ્યાં મોત નાચતું ત્યાં સંજીવની શી તારી
પલટી રહી બધું આ ચડતી અજબ ખુમારી.
આ સંગમે સંસારનો સૌ સંગ સરી ગયો. — તારી

(પ્રેષક: સંજય રાઠોડ)