આમ તો હવે ગુજરાતી ભાષાની અસંખ્ય વેબસાઇટ્સ અને બ્લોગ્સ છે, પણ ફક્ત નવ જ મહિનામાં ‘આપણું આંગણું’ એ પોતાની એક અલગ ઓળખ ઉભી કરી છે, આજે એ બ્લોગ વિષે થોડી વાતો, બ્લોગના સર્જક – જયશ્રી વિનુ મર્ચન્ટના જ શબ્દોમાં.

—————–

વ્હાલાં વાચકો, સર્જકો, મિત્રો અને શુભેચ્છકો,

“દાવડાનું આંગણું”ના નવા અવતાર, “આપણું આંગણું” બ્લોગને હવે નવ મહિના પૂરા થયા છે. ૧૩ નવેમ્બર ૨૦૨૦ના રોજ ધનતેરસના દિવસે પ્રારંભ થયેલું “આપણું આંગણુ” આપ સહુના સ્નેહ-સિંચનથી મહેકી ઊઠ્યું છે. આપ સહુના અસીમ પ્રેમ માટે આપના આભારી છીએ. બ્લોગની પ્રવૃત્તિથી આપને માહિતગાર કરવા ઈચ્છુક છીએ, જેથી આ NGO પ્રવૃત્તિનો વિસ્તાર થાય.

પોસ્ટ: નવ મહિનાના સમયગાળામાં સર્જકો અને વાચકોનો સ્નેહ સંપાદિત થયાનું પ્રતિપાદન આ આંકડાઓ જ કરી આપશે. દિવસ: ૨૮૪, કુલ પોસ્ટ : ૨૯૨, વ્યૂઅર્સ: ૩૬,૫૦૪, વ્યૂઝ : ૭૯,૧૬૭.

કાર્યક્રમો: સંપાદક, Editor in Chief, યુવાન સાહિત્યકાર હિતેન આનંદપરાના અથાક પ્રયત્નોથી હવે “આપણું આંગણું”ના બેનર તળે દર મહિને સાહિત્ય અને કલા જગતના ફલકનો ઉઘાડ કરતાં કાર્યક્રમોનું આયોજન કરવામાં આવે છે. એ વિષેની સૂચના પણ બ્લોગના માધ્યમથી બ્લોગના સબસ્ક્રાઈબરોને મોકલવામાં આવે છે. ઓગસ્ટ ૨૦૨૧ સુધીમાં ૧૮ કાર્યક્રમો સંપન્ન થયા છે.

શિબિરનું આયોજન: બ્લોગ દ્વારા ફેબ્રુઆરી ૨૦૨૧માં ત્રણ દિવસની ટૂંકી વાર્તા શિબિર કરી, જેમાં યુનિવર્સીટી ઓફ પેન્સિલવેનિયાના રિટાયર્ડ ફેકલ્ટી અને ગુજરાતી ભાષાના ખમતીધર સાહિત્યકાર – કવિ, નવલકથાકાર, વાર્તાકાર અને વિવેચક ડો. બાબુભાઈ સુથારે સર્જકો માટે જરૂરી એવા અનેક પાસાઓનો ઉઘાડ કર્યો હતો.

જૂન ૨૦૨૧માં બહુઆયામી સર્જક મણિલાલ હ. પટેલમાં માર્ગદર્શનમાં “લલિત નિબંધ શિબિર” સાકાર થઈ. શિક્ષકો અને વિદ્યાર્થીઓને ધ્યાનમાં લઈને “વાર્તા શિબિર”નું આયોજન ૨૭-૨૮-૨૯ ઑગસ્ટના રોજ થયું છે. તે ઉપરાંત આગામી મહિનાઓમાં ગઝલ શિબિર, ગીત શિબિર, નાટ્યલેખન શિબિરનું આયોજન નિર્ધારિત છે.

અનુસંધાન: અમારી પ્રતિબદ્ધતા માત્ર શિબિરના દિવસો પુરતી મર્યાદિત નથી. શિબિર સમાપ્ત થયા પછી પણ છ મહિના સુધી ફોલો અપ સેશન્સ રાખવામાં આવે છે. આ બધી શિબિરોનો એક જ ઉદ્દેશ છે કે સર્જકની કલમને ધાર મળે તથા સારા અને શિષ્ટ સાહિત્યની સુગંધ ગુજરાતીઓના ઘરઘર સુધી પહોંચે.

અમારી સાથે જોડાઓ: આપે હજુ “આપણું આંગણું” સબ્સક્રાઇબ ન કર્યું હોય તો અવશ્ય કરજો. સબ્સક્રિપ્શન બિલકુલ નિ:શુલ્ક છે. આપ, અમેરિકામાં કે વતનમાં કે દુનિયાના કોઈ પણ ખૂણામાં “આપનું આંગણું”માં મૂકાતી પોસ્ટ રોજ આપની પસંદગીના માધ્યમથી – ઈમેલ કે વોટ્સએપથી – મેળવી શકશો. આપ સહુને આ બ્લોગ વાંચવા http://aapnuaangnu.com/ ની સાઈટ પર જવા નમ્ર વિનંતી છે. વોટ્સએપ પર પોસ્ટ મેળવવા અથવા ઈમેઈલથી પોસ્ટ મેળવવામાં તકલીફ પડતી હોય તો આપ અમને aapnuaangnu@gmail.com પર સંપર્ક કરી શકો છો અને અમે એનું નિવારણ બનતી ત્વરાથી અવશ્ય કરીશું.

વોટ્સએપ ગ્રુપમાં જોડાવા માટેની લિંક:
૧. અમેરિકા, બ્રિટન, ઓસ્ટ્રેલિયા વગેરે દેશોના સર્જકો / વાચકો માટેની લિંક:
https://chat.whatsapp.com/LKoEAWj17Bo2q0NRHzPrVGBlog 🇺🇸 આપણું આંગણું USA

૨. ભારતીય સર્જકો / વાચકો માટેની લિંક:
https://chat.whatsapp.com/EJss3i8MVL1J9vAi99V97h
૩. જો ઉપરની લિંક સંલગ્ન ગ્રુપ Full થઇ જાય તો નવી લિંક મેળવવા બ્લોગના આ વોટ્સએપ નંબર પર મેસેજ કરવો: +91 8850074946.

આભાર-વંદના: અને છેલ્લે, આ બધું જ અમારા માટે દિવંગત વડીલબંધુ પુરષોત્તમભાઈ દાવડાના આશિષ થકી જ શક્ય બન્યું છે. “દાવડાનું આંગણું” વિના ‘આપણું આંગણું” સર્જાયું જ ન હોત. દાવડાભાઈ, મને આપની કમી સદા સાલે છે અને સાલતી રહેશે. ભાઈ, હું આપને હ્રદયપૂર્વક વંદન કરું છું. આપને મારી અશ્રુભરી શ્રદ્ધાંજલિ.

~ જયશ્રી વિનુ મરચંટ
(આપણું આંગણું બ્લોગ)