કંઠી બાંધી છે તારા નામની – અશરફ ડબાવાલા

કંઠી બાંધી છે તારા નામની
અઢળક અને અઢીમાં ફેર નહીં કાંઈ એવી લાગી મમત તારા ગામની.

માગ્યું મળે ને મન છલકાતું હોય ત્યારે કાંઠાનું ભાન રહે કેમ ?
કેટલા કોરા ને અમે કેટલા ભીંજાણા ઇ પૂછો ના મે’તાજી જેમ.
સાચું પૂછો તો એક જણને મળ્યા અને જાતરા ગણો તો ચાર ધામની
… કંઠી બાંધી છે તારા નામની

કેડીથી આડી ફંટાઈ મારી ઘેલછા કાંડું પકડીને મને દોરે
ચરણો ને ચાલની તો વાત જ શું કરવી ? હું ચાલું છું કોઈના જોરે
મોજડીની સાથ મોજ રસ્તે ઉતારી, હવે મારે નથી કોઈ કામની
… કંઠી બાંધી છે તારા નામની

– અશરફ ડબાવાલા

4 replies on “કંઠી બાંધી છે તારા નામની – અશરફ ડબાવાલા”

  1. ખુબ સુંદર …. જાને કેટલાય વખતથી મનમા રાહેલા સમયનિ યાદ તાજી થઈ ગૈ.
    ખૂબ ખૂબ આભાર

  2. “એક જણને મળ્યા અને જાતરા ગણો તો ચાર ધામની”
    કેટલુ પુણ્ય હશે આ મિલન! વાહ અશરફભાઈ, બહુ ખુબ!

  3. ” કંઠી ” એટલે “ઈશ-કૃપા”ના તત્વ માં પૂરી પાકી ૧૦૦% શ્રધ્ધા !
    ” માગ્યું મળે ને મન છલકાતું હોય ત્યારે કાંઠાનું ભાન રહે કેમ ?
    કેટલા કોરા ને અમે કેટલા ભીંજાણા ઇ પૂછો ના મે’તાજી જેમ.”
    ( ન માગ્યું, જોઈતું સ્વયમ આવી મળે તેનું શું?….. આવા જેના અનુભવો હોય, તેની “શ્રધ્ધાને શું કહેશો?) )
    વળી પાછું, ‘નામ-સ્મરણ’નો મહત્વ (મહિમા) પણ એટલુંજ !

    “અઢળક અને અઢીમાં ફેર નહીં”, +
    ( “પ્રેમ” મળે પછી કોઈ ગણતરીનો સવાલ જ નહીં ને!

    “એક જણને મળ્યા અને જાતરા ગણો તો ચાર ધામની”
    (આ તો ભાઈ ,એકે હજારા જેવી વાત જ …છે ને ?)
    અશરફ ડબાવાલા અને ” મોજ” કરાવનારને જાજેરા અભિનંદન …આભાર પણ …
    -લા’ કાન્ત / ૧૦.૧.૧૫

Leave a Reply

Your email address will not be published. Required fields are marked *