કવિ: દલપત પઢિયાર
સ્વરાંકન, સંગીત અને સ્વર : સૂર
તબલા : ધ્રુવ જોષી
ગિટાર: સાહિલ પરમાર

કોઈ મને મૂકી આવો એવા સ્થળે,
જ્યાં માટી જેવું મળે,
ઊંડા ચીરા હોય ચાસના તોય ખેતરને
લેણું આખર હળે.

નીંઘલતા ખેતરની મઘમઘ ફોર લઇ
કોઈ ઊડે છે,
કોઈ અચાનક ઊંઘમાં આવી
ઘઉંના પૂડા ઝૂડે છે,
કોણ મને ગાંસડી એ બાંધે
કોણ ઉપણે ખણે

કોઈ મને મૂકી આવો એવા સ્થળે,
જ્યાં માટી જેવું મળે

થોડો પણ વરસાદ પડે ને
વગડો આખો ઊઘલે છે
માણસ નામે ગ્રંથ મીઢો છે
ક્યાં કદીએ ઊકલે છે?
‘ઝાડ’ એટલું બોલો ત્યાં તો
લીલું વાદળ ઢળે

કોઈ મને મૂકી આવો એવા સ્થળે,
જ્યાં માટી જેવું મળે

-દલપત પઢિયાર