પઠન: વિનોદ જોશી

.

જો, આ રીતે મળવાનું નંઈ !
દરિયો તો હોય, તેથી નદીએ કંઇ દોડીને,
આ રીતે ભળવાનું નંઈ!

પાંદડી ગણીને તને અડક્યો ને મારામાં
ઊડઝૂડ ઊગ્યું એક ઝાડ,
ખિસકોલી જેમ હવે ઠેકીને
એક એક રુંવાડે પાડે તું ધાડ;

છીંડું તો હોય, તેથી ઊભી બજારેથી,
આ રીતે વળવાનું નંઈ!

એમ કાંઈ એવું કહેવાય નહીં
કહેવાનું હોય કોઈ પૂછે જો તો જ,
જેમ કે અનેક વાર તારામાં
ભાંગીને ભુક્કો હું થઇ જાતો રોજ;

જીવતર તો હોય, તેથી ગમ્મે ત્યાં ઓરીને,
આ રીતે દળવાનું નંઈ!
– વિનોદ જોશી