રચના: અવિનાશ વ્યાસ
સંગીત: ગૌરાંગ વ્યાસ
સ્વર: સંજીવની

કેડીનો છેવાડો આવ્યો ઈશ્વર દૂરનો દૂર છે

ગામ ગામ ને નગર નગર, મંદિર મોટાં મશહૂર છે
શ્યામસુંદર ની મૂરત બનાવી હોઠે મુરલી મધુર છે.
પણ ઈશ્વર દૂર નો દૂર છે….

પાંખ મોટી ને ગગન છે નાનું તોય પંખી થઈને ઊડ્યું
પંડમાં મારા પરમેશ્વર તોય પરમેશ્વરને ઢુંઢુ
કોઈ ન ચીંધે મારગડો મને, સહુમાં સહુ ચકચૂર છે
પણ ઈશ્વર દૂરનો દૂર છે….

સિંધુ ધરી જો પર હોય દયાનું બિંદુ જો ભગવાનમાં
તો શ્રધ્ધાનો દીપ રાખી સળગતો આંધી આ તુફાનમાં
કોણ જીતે ને કોણ હારતું જોવા સહુ આતુર છે
પણ ઈશ્વર દૂરનો દૂર છે….

ઘડી તડકો ઘડી છાયો વાટમાં ઘડી દિવસ ઘડી રાત
કંઈ ઝરણા કાંઈ  નદીઓ આવી આવ્યો ન ગંગાઘાટ
આવ્યા આખી પ્યાસ બુઝાવવા આંસુડાના પૂર છે
પણ ઈશ્વર દૂરનો દૂર છે..

(પ્રેષક: પ્રણય વસાવડા)

કવિ: હિતેન આનંદપરા

(1) સ્વરકાર: પરેશ નાયક
સ્વર: દિવીજ નાયક

ઝાઝું નજીક નહીં જાવું
કોઈની ઝાઝું નજીક નહીં જાવું
પાછળથી શાને પસ્તાવું ?

અંતર એક અદકેરું જાળવતાં આવડે તો સંબંધો ફૂલે નહીં, ફાલે
એક બે જણ ખાલી સોંસરવા રાખીને બાકીને રામરામ ચાલે
મોંઘેરી લાગણીનાં કરવાં જતન, નાહકનું શાને સસ્તાવું?
કોઈની ઝાઝું નજીક નહીં જાવું

ઇશ્વર સિવાય કોઈ સર્જક નથી, આ માણસ તો ખાલી વચેટિયો
આઘેથી ઊંચા પહાડ જેવો લાગે, ઓરા જાઓ તો સાવ વ્હેંતિયો
સર્જકને માન, એના સર્જનને માન, વચેટિયામાં નાહક અટવાવું
કોઈની ઝાઝું નજીક નહીં જાવું

***
(2) સ્વરકાર: રિષભ મહેતા
સ્વર: રિષભ મહેતા – ગાયત્રી ભટ્ટ

ગીત: રમેશ પારેખ
સ્વરાંકન-સ્વર: સુરેશ જોશી

હે દીવા! તને પ્રણામ…
અંધારામાં કરતો તું તો સૂર્ય-ચન્દ્રનું કામ

તારાં મૂઠીક કિરણોનું કેવું અલગારી તપ!
પથભૂલ્યાને પ્રાણ પાઈને કહેતાં – આગળ ધપ,
ગતિ હશે પગમાં તો મળશે કદીક ધાર્યું ધામ.
હે દીવા! તને પ્રણામ…

જાત પ્રજાળીને ઝૂઝવાનું તેં રાખ્યું છે વ્રત,
હે દીવા! તું ટકે ત્યાં સુધી ટકે દૃષ્ટિનું સત!
તું બુઝાય તે સાથ બુઝાઈ જાતી ચીજ તમામ
હે દીવા! તને પ્રણામ…

~ રમેશ પારેખ