શાંત મનની ખીણમાં – હેમેન શાહ

જ્યારે હું તારા વિચારોમાં અછડાતો હોઉં છું,
દૂરના જંગલપ્રદેશમાં રખડતો હોઉં છું.

શાંત મનની ખીણમાં પડઘાય તારું નામ જ્યાં,
હું જ અસ્થિર ભેખડો માફક ગબડતો હોઉં છું,

રાતની ઊઘડી ગયેલી બારીની તું બહાર જો,
ક્યાંય જાગ્રત પાંદડાઓમાં ખખડતો હોઉં છું.

હું ઉલ્લંઘી કાળ ને સ્થળ, સ્વપ્ન તારું જોઉં છું,
પ્રાત:કાળે સૂર્યની સાથે ઝગડતો હોઉં છું.

જાય છે ઓફિસ તરફ જે, એ જ રસ્તામાં કશે,
હું ખરેલી સૌ વસંતોને કચડતો હોઉં છું.

4 replies on “શાંત મનની ખીણમાં – હેમેન શાહ”

  1. શાંત મનની ખીણમાં પડઘાય તારું નામ જ્યાં,
    હું જ અસ્થિર ભેખડો માફક ગબડતો હોઉં છું…

    …ખૂબ જ ઉમદા શે’ર…

  2. ધવલ says:

    આ ગઝલ મારી ખુબ ગમતી ગઝલોમાંથી એક છે. અસંખ્ય વાર વાંચી અને ટાંકી હશે. જ્યારે નેટ પર કવિતાઓ મૂકવાનો વિચાર પહેલ વહેલી વાર આવેલો ત્યારે પહેલી આ ગઝલ મૂકેલી (http://www.dhavalshah.com/Poetry%20files/shaant-man-ni-khin-ma.gif ) … યુનિકોડ કે ગુજરાતી ટાઈપિંગ શીખ્યા પહેલા ! આ ગઝલ એટલી અંગત છે કે એ લયસ્તરો પર નથી મૂકી એવું કદી યાદ જ આવ્યું !

  3. harshad Jangla says:

    ડોક્ટર અને કવિનો કેવો સુંદર સમન્વય!
    હેમેનભાઈ લખતા રહેજો

  4. Pravin Shah says:

    હું ઉલ્લંઘી કાળ ને સ્થળ, સ્વપ્ન તારું જોઉં છું,
    પ્રાત:કાળે સૂર્યની સાથે ઝગડતો હોઉં છુ……
    આવા સુંદર સ્વપ્નમાંથી જાગવું કોને ગમે? આ ભાવ કવિએ અહીં
    ખૂબ જ સુંદર રજુ કર્યો છે.

Leave a Reply

Your email address will not be published. Required fields are marked *