આજ મને બા, આજ એમ મને થાય,
મીંદડીનું નાનું હું બચ્ચું બની જાઉં,
છાનુંમાનું આવી તારું દૂધ પી જાઉં!
આજ મને બા, આજ એમ મને થાય,
રાતુડું નાનકડું કુરકુરિયું થાઉં,
હાઉ હાઉ કરી કરડવા ધાઉં!
આજ મને બા, આજ એમ મને થાય,
ખિલ ખિલ મોગરાનું ફૂલ બની જાઉં,
તારે અંબોડલે આવી સંતાઉં!
આજ મને બા, આજ એમ મને થાય,
ગોળ ગોળ સાબુડો તારો થઈ જાઉં,
સરી સરી હાથમાંથી ખીજવું પજવું!
આજ મને બા, આજ એમ મને થાય,
તારો ઝગમગતો અરીસો થાઉં,
એરિયાં પાડું ને તારી આંખ ઝંખવાઉં!
