પુંકેસરની છાતી ફાટી છે – વિવેક મનહર ટેલર

flowers by Vivek

(પુંકેસરની છાતી…  …લેહની ધરતી પરથી, જુન, ૨૦૧૩     Picture by: Vivek Tailor)

*

સવાર ફાટી પડી, આ શી ઘડબડાટી છે ?
નિયત આ રાતની શા માટે આજે ખાટી છે ?

યુગો પછી આ પુંકેસરની છાતી ફાટી છે,
નિતાંત પાનખરે શેની આ ગુલાંટી છે ?

ઉષરભૂમિને શું જુએ છે ? હા, એ હું જ છું પણ
તું આવ, ત્યાં જો કઈ શક્યતાઓ દાટી છે ?

એ લાગણીનું બીજું નામ આપવું શું, કહો
ડૂબો જ્યાં તળ સુધી પણ થાય કે સપાટી છે.

પસાર થઈ ગઈ છે ટ્રેન હડબડાટીમાં,
ને પ્લેટફૉર્મે હજી એ જ ધણધણાટી છે !

મને લૂંટી જ લે છે, જ્યારે જ્યારે આવે છે
આ તારી યાદ છે કે ગામનો તલાટી છે ?

ગઝલમાં તું જ તું, તારા વિચાર, તારી વાત,
અમે મફતમાં છતાં પણ પ્રસિદ્ધિ ખાટી છે.

ચકિત ન થા તું, પ્રલાપોથી કોરા કાગળના,
ગઝલ ! તું હોય નહીં એ જ સનસનાટી છે…

વકી છે, આજે પ્રથમવાર એ નજર ફેંકે,
ગઝલની આખીય કાયામાં ઝણઝણાટી છે.

– વિવેક મનહર ટેલર
(૦૨/૦૩-૦૪-૨૦૧૩)

5 replies on “પુંકેસરની છાતી ફાટી છે – વિવેક મનહર ટેલર”

  1. Suresh Shah says:

    કવિતા અદ્રશ્ય છે. કેવી રીતે મેળવવી?

  2. Chandra Talaviya says:

    ખુબ જ સરસ ….
    મને લૂંટી જ લે છે, જ્યારે જ્યારે આવે છે
    આ તારી યાદ છે કે ગામનો તલાટી છે ?
    ગઝલમાં તું જ તું, તારા વિચાર, તારી વાત,
    અમે મફતમાં છતાં પણ પ્રસિદ્ધિ ખાટી છે.
    અતિ સુન્દર

  3. સશક્ત અભિવ્યક્તિ…

  4. Maheshchandra Naik (Canada) says:

    વકી છે, આજે એ પ્રથમવાર નજર ફેકે………………. ગઝલકારની લાગણી માટે આટ્લુ જ બસ છે……..

  5. સહુ મિત્રોનો ખૂબ ખૂબ આભાર…
    આભાર, જયશ્રી, અમિત…

Leave a Reply

Your email address will not be published. Required fields are marked *