Category Archives: મણિલાલ હ. પટેલ

વસંતનું પદ – મણિલાલ હ. પટેલ

(ઊડી ગયેલું જંગલ લઈને પંખી ડાળે આવ્યાં…..Bharatpur Bird Sanctuary)

કુંજડીઓ થૈ બોલે છે પડછાયા
વહી ગયેલા પાછા કોના ઘરમાં આવ્યા ?….

કોણ ક્યારનું હળથી મારી પડતર માટી ખેડે ?
અડધું ઊગે અંકુર થઈને પડધું પૂગે શેઢે
ખેતરને ભીંજવતી આજે ટહુકે કોની છાયા ?
કુંજડીઓ થઈ બોલે છે પડછાયા….

ઝાકળ જેવી આંખો ખોલી શેઢે સસલું બોલે
આંબા ઉપર ફૂટે મંજરી સીમ ચઢી છે ઝોલે
ફૂલ ફૂલમાં આભ ઊતર્યું સૂરજ થઈ છે કાયા
કુંજડીઓ થઈ બોલે છે પડછાયા….

ઊડી ગયેલું જંગલ લઈને પંખી ડાળે આવ્યાં
વહી ગયેલા દિવસો પાછા સૂના ઘરમાં લાવ્યાં –
કુંજડીઓ થઈ બોલે છે પડછાયા.

– મણિલાલ હ. પટેલ