રચના: મનોજ ખંડેરિયા
સ્વરકાર: રાસબિહારી દેસાઈ
સ્વર: અમર ભટ્ટ
ક્યારેક એવો થાય અનુભવ અવાજનો
અડકું તો ઓગળી જતો પાલવ અવાજનો
ઊડી જજો હે મારા ધવલ મૌનનાં વિહગ
લાગ્યો છે આજ જંગલોમાં દવ અવાજનો
ઘોંઘાટિયા શહેરમાં તારું ટહુકવું
ખીલ્યું છે એક પદ્મ ને કાદવ અવાજનો
અર્થોની અપ્સરાઓ બધી ક્યાં ગઈ કહો
ઝાંખો હવે પડી ગયો વૈભવ અવાજનો
આજે પવન ફરીથી અચાનક પડી ગયો
થાયે કદાચ ક્યાંકથી ઉદ્ભવ અવાજનો
***
