શક્યતા ક્યાં વૃક્ષની કૂંપળ વગર ! – ગૌરાંગ ઠાકર

ટોચની હો કલ્પના ક્યાં તળ વગર !
શક્યતા ક્યાં વૃક્ષની કૂંપળ વગર !

છાપ સિક્કાની મને બંને ગમે
માત્ર તું એને ઉછાળે છળ વગર !

પુષ્પ છું પરવા નથી શણગારની
ફક્ત ફોરમ આપ તું ઝાકળ વગર !

આભને પણ છે વિચારોનાં દુઃખો
ક્યાં રહે પળવાર એ વાદળ વગર !

એક એવા રણ વિષે કલ્પી જુઓ
દોડવાનું હોય જ્યાં મૃગજળ વગર !

પૂર્ણતા પુરવાર કરવા શું કરે !
દ્વારને હોવું મળે સાંકળ વગર !

વીજ જાણે આભ હ્સ્તાક્ષર કરે !
હાથ, શાહી કે કલમ, કાગળ વગર !

– ગૌરાંગ ઠાકર

7 replies on “શક્યતા ક્યાં વૃક્ષની કૂંપળ વગર ! – ગૌરાંગ ઠાકર”

  1. છાપ સિક્કાની મને બંને ગમે
    માત્ર તું એને ઉછાળે છળ વગર
    સરસ શેર.

    વીજ જાણે આભ હ્સ્તાક્ષર કરે !
    મને પેલા અન્ગ્રેજ કવિ યાદ આવ્યા.

  2. વીજ જાણે આભ હ્સ્તાક્ષર કરે !
    હાથ, શાહી કે કલમ, કાગળ વગર !

    અદભૂત કલ્પના…. ખૂબ જ સુંદર રચના…

    ‘મુકેશ’

  3. છાપ સિક્કાની મને બંને ગમે
    માત્ર તું એને ઉછાળે છળ વગર ! VAHHHH……..

  4. છાપ સિક્કાની મને બંને ગમે
    માત્ર તું એને ઉછાળે છળ વગર !

    આ તો મારી ગમતી વાત……..

    ટોચની હો કલ્પના ક્યાં તળ વગર !
    શક્યતા ક્યાં વૃક્ષની કૂંપળ વગર !

    બહુત ખૂબ મત્લા !!

  5. પૂર્ણતા પુરવાર કરવા શું કરે !
    દ્વારને હોવું મળે સાંકળ વગર !
    સરસ
    યાદ આવી
    મેં તને પૂર્યો કવનનાં શબ્દમાં મોઘમ, સખા !
    તોયે આવી ટેરવે ટકરાય છે કારણ વગર.

Leave a Reply

Your email address will not be published. Required fields are marked *