ગઝલ – ડૉ. હરીશ ઠક્કર

લયસ્તરો પર આ ગઝલ વાંચી અને તરત જ અહીં લઇ આવી… ડૉ. વિવેક કહે છે એમ – દરેક શેર એક સ્વતંત્ર કાવ્ય છે… કયા શેરને વખાણવો અને કયાને નહીં ?
***

ક્યારેક દુશ્મની કરે, ક્યારેક મિત્ર છે,
જો ને ઋણાનુબંધ આ કેવો વિચિત્ર છે !

તરસાવે તો છે રણ અને વરસાવે તો ગગન,
કેવું અનોખું, લાગણી ! તારું ચરિત્ર છે !

ગંગા સુધી જવાય ના તો શી ફિકર તને
જે આંખથી વહે છે તે સૌથી પવિત્ર છે.

બીજા બધા તો ઠીક છે, મારા સગડ નથી,
મારી ગઝલ શું કોઈનું જીવન ચરિત્ર છે ?

સારું થયું કે હૂબહૂ દોરી નથી શક્યો,
જાણી જતે એ જેમનું આ શબ્દચિત્ર છે.

– ડૉ. હરીશ ઠક્કર

4 replies on “ગઝલ – ડૉ. હરીશ ઠક્કર”

  1. સાદ્યંત સુંદર રચના….

  2. kanan says:

    ખૂબ સુંદર રચના

  3. jAYANT SHAH says:

    સરસ રચના .ગમી .

  4. જે આંખથી વહે છે, એ સૌથી પવિત્ર છે
    વાહ હરીશભાઇ,
    બહુજ સંવેદનશીલ વાત કહી
    -અભિનંદન મિત્ર!

Leave a Reply

Your email address will not be published. Required fields are marked *