Category Archives: બાળગીત

સસલો

સ્વર: મોનલ શાહ

.

સસલો જાણે કેમ સિનેમામાં ગયો
સસલા એ મારી તાન ગાયું સુંદર ગાન સારેગમ…

દિગ્દર્શક બોલ્યો વાહ વાહ
તો સસલો બોલ્યો લાવો ચા

કોણ જાને કેમ પાછો સસલો સર્કસમાં ગયો
સસલાએ કુદકો માર્યો ને સીડી માથે ચઢ્યો

જોકર એના કરે વખાણ
તો સસલો બોલ્યો લાવો પાન

સસલો થઈને ડાહ્યો નિશાળે ભણવા ગયો
સસલો આંક બોલે ને પાઠ ભણતો ડોલે.

એકડે એક, બગડે બે, તગડે ત્રણ, ચોગડે ચાર,
ગુરુ કહે શાબાશ તો સસલો કહે કરો પાસ.

વાંદરો ભાઈ વાંદરો -રૂપાંગ ખાનસાહેબ

સ્વર : રૂપાંગ ખાનસાહેબ
સંગીત : મેહુલ સુરતી

.

વાંદરો ભાઈ વાંદરો, હૂપ હૂપા હૂપ વાંદરો,
ઝાંપે બેસી મારો બેટો મારો સ્ટાઈલ ફાંફડો..

એક વાંદરો લઈને આવ્યો ફેરિયાની ટોપી
જોવા એને વાંદરાભાઈની મિટીંગ મળી મોટી

બાજુવાળા પસાકાકાની ગાડીનો અરીસો
જોઈ વાંદરો ફુકાયોને હસતો ખી.ખી.ખી…

એની લાંબી લાંબી વાંકી ચૂંકી
લાંબી લાંબી દોરડા જેવી
લાંબી લાંબી આડી અવળી
લાંબી લાંબી વ્હાલી વ્હાલી
વાંકી ચૂંકી દોરડા જેવી આડી અવળી વ્હાલી વ્હાલી
અરે શું? … પૂંછડી પૂંછડી

કાળુ એનું મોઢું ધોળા ધોળા એના વાળ
પૂંછ ઉંચી રાખી, ચાલે રાજા જેવી ચાલ
એના કાકા કાકી, એના મામા મામી, ફોઈ ફુઆ, ભાઈ બહેન
બધાને ખંજવાળ આવે, બધાને ખંજવાળ
આખો’દી ખંજવાળ આવે, આખો’દી ખંજવાળ
ફેમીલી કમાલ એનું ફેમીલી ધમાલ
કરે હૂપ, બધા હૂપ સાથે હૂપ
કરે હૂપ, હૂપ, હૂપ.

મંજુમાસી લઈને નીકળ્યા
ભાજીની એક થેલી
મોકો દેખી વાંદરાભાઈએ
તરાપ મારી વહેલી
મંજુમાસીને ગુસ્સો આવ્યો
લઈને પત્થર છુટ્ટો માર્યો
થેલી ફેકી ભાગ્યો વાંદરો, કૂદી વાડને કૂદી બાંકડો
ધમપછાડ બુમ બરાડા
છોકરા હસતાં ખી ખી ખી ખી
– રૂપાંગ ખાનસાહેબ

કેવી મજા – સુરેશ દલાલ

.

મોટેથી લડવાની, મોટેથી રડવાની,
લડીને રડવાની, રડીને લડવાની,
કેવી મજા ભાઈ કેવી મજા.

ચડીને પડવાની કેવી મજા
પડીને ચડવાની કેવી મજા
વાદળ પકડવાની, ચાંદો જકડવાની
અક્કડ અકડવાની, કેવી મજા

જીદ્દીને તોફાની થઈને ઝઘડવાની કેવી મજા
ઝઘડીને કિટ્ટાની, કિટ્ટાને બુચ્ચાની કેવી મજા.

જબરાને પોચાની, ડાહ્યાને લુચ્ચાની
બાળક થવાની કેવી મજા
-સુરેશ દલાલ

છૂક છૂક ગાડી -રૂપાંગ ખાનસાહેબ

સ્વર: રૂપાંગ ખાનસાહેબ
સંગીત: મેહુલ સુરતી

.

છૂક છૂક છૂક છૂક
છૂક છૂક કરતી
ઉપડી જુઓ ગાડી
ગાર્ડ બતાવે લીલી ઝંડી
એન્જીને ચીસ પાડી …

આડા ઉભા વાંકા ચૂકા સાથે દોડે પાટા
ગામ ઠામ ને શહર નગરને જોડે છે આ પાટા

ઝાકળ ધુમ્મસ વાદળ વર્ષા વૃક્ષ પવનને મેઘધનુષ
પર્વત જંગલ ઝરણા નદીઓ સાથે મળીને ગાતાં

છૂક છૂક ગાડી આગળ જાતી સ્ટેશન ઊંધા જાતા

ડબ્બાની આગળ છે ડબ્બો
ડબ્બાની પાછળ છે ડબ્બો
હાલમ ડોલમ થાય છે ડબ્બો
ડોલમ હાલમ થાય છે ડબ્બો

ટીકીટ બતાવો ટીકીટ બતાવો કહેતો ફરતો
ટી ટી પહેરી કાળો ઝબ્ભો

ધરમ કરમનો ભેદ ભૂલીને હિંદુ મુસ્લિમ
શીખ ઈશાઈ સૌને લઈને ચાલી

ગાર્ડ બતાવે લીલી ઝંડી એન્જીને ચીસ પાડી..
છૂક છૂક….
-રૂપાંગ ખાનસાહેબ

ચાંદામામા આવો ને -એની સરૈયા

સંગીત: આશિત દેસાઈ

.

ચાંદામામા આવો ને
આંગળીએ વળગાડી મુંજને
આભે તેડી જાઓને

ચાંદામામા દેશ તમારે
તારકટોડી ભાળી રે
રાત પડે અંધારી ત્યારે
રાસ રમે દઈ તાળી રે
તારલીયોની સંગે મુજને
રમવાને લઇ જાઓને … ચાંદામામા

ચાંદામામા દેશ તમારે વાદળિયોને ભાળી રે
રાત પડે ત્યારે સંતાકૂકડી
રમે બધીએ રૂપાળીરે
વાદળીયોની સંગે મુજને
રમવાને લઇ જાઓને … ચાંદામામા
– એની સરૈયા

ચકધૂમ – રૂપાંગ ખાનસાહેબ

.

ચક ધૂમ ધૂમ.. ચક ધૂમ ધૂમ ધૂમ
ક્લાસરૂમમે મચ ગઈ ધૂમ
ટીચર ગયે છુટ્ટીપે તો lets play મસ્તી કી Tune

લેશન બેશન છોડ કે મસ્તીમે હમ ખો જાયે
ચંદુ કે ચશ્મે પહન કે ટીચર હમ બન જાયે

કાગજ કા હમ બોલ બનાયે ફૂટ રુલ કા બેટ
બ્લેક બોર્ડ પે આઓ બનાયે પ્રિન્સીપાલ કે સ્કેચ
ચક ધૂમ….

મુક્શીલ સે મીલતા એ મૌકા મીલકર શોર મચાયે
આજ યહા કે હમ તો રાજા કિસસે હમ ઘભરાયે

દેખો ધ્યાન સે દુર દુર તક ટીચર જો આ જાયે
ઉલટી બુક મે છુપા કે સર અચ્છે બચ્ચે બન જાયે
ચક ધૂમ …

– રૂપાંગ ખાનસાહેબ

દિવાળી – રૂપાંગ ખાનસાહેબ

.

ઝગમગતીને ટમટમતી, જુઓ દિવાળી આવી
તારલિયાની ટોળી આવી સુંદરને રૂપાળી
શાળાએતો રજા રજા ફટાકડાની મજા મજા

મારા ઘરનાં આંગળે રંગોળીની ભાત
દીવાથી દીપાવીએ અંધારી આ રાત
ઘરમાં બનતા સૌને ગમતા
મઠીયા ને સુવાળી…

બોમ્બ ધડાકા કરીએ ચાલો પપ્પાનો લઈને સાથ
ફટાકડાનો છો ને થાતો બા દાદાને ત્રાસ
સાલમુબારક, સાલમુબારક કહીએ સૌને
નમીએ શીશ ઝુકાવી …
-રૂપાંગ ખાનસાહેબ

દાદાની મૂંછ

સ્વર: રૂપાંગ ખાનસાહેબ

.

બડી લંબી રે મારા દાદાની મૂંછ ,
દાદાની મૂછ જાણે મીંદડીની પૂંછ…બડી…

દાદાજી પોઢ્યા’તા સીસમને ઢોલીએ,
શાહીથી રંગી મેં દાદાની મૂછ…બડી…

બચુભાઈના પારણાની તૂટેલી દોરથી,
જોરથી બાંધી મેં, દાદાજીની મૂછ..બડી..

કાતર લઈને કાગળિયા કાપતો,
કચ,કચ કાપી મે દાદાની મૂછ … બડી..

પંડિત ચાલ્યા જાય છે

સંગીતકારઃ રૂપાંગ ખાનસાહેબ
સ્વર: રૂપાંગ ખાનસાહેબ અને વૃંદ

.

પંડિત ચાલ્યા જાય છે, પંડિત ચાલ્યા જાય છે.
પગમાં જૂનાં જૂતાં પહેરી પંડિત ચાલ્યા જાય છે.
આંબા ઉપર કેરી દેખી પંડિત જોવા જાય છે
તડાક કરતા કેરી તૂટી ટાલ પર કુટાય છે.
લોહી વહી જાય છે ને પંડિત ચાલ્યા જાય છે.
ખીસામાંથી ડબ્બી કાઢી છીકણી સુંઘવા જાય છે.
હાક છી હાક છી કરતા કરતા ચોટલી ફર ફર થાય છે.
આકાશે એરોપ્લેન દેખી પંડિત જોવા જાય છે.
આમતેમ આમતેમ ફાંફા મારતા ગધેડે અથડાય છે.
પંડિત ચાલ્યા જાય છે, પંડિત ચાલ્યા જાય છે

ઇટ્ટા કિટ્ટા -સુરેશ દલાલ

સ્વર:ઐશ્વર્યા હિરાની, સુપલ તલાટી
સ્વરકાર:મોનલ

.

કનુઃ ઈલા! તારી કિટ્ટા!
ઈલા: કનુ! તારી કિટ્ટા!
કનુઃ ઈલા! તારી કિટ્ટા!
ઈલા:મારી પાસે મીઠી મીઠી શેરડી ને શીંગો,
લે હવે તું લેતો જા હું આપું તને ડિંગો.
કનુઃમારી પાસે ખાટી મીઠી આંબલી ને બોર,
એકે નહીં આપું તને છોને કરે શોર.
ઈલા:જાણે હું તો આંબલી ને બોરનો તું ઠળિયો,
ભોગ લાગ્યા ભાયગના કે ભાઈ આવો મળિયો.
કનુ:બોલી બોલી વળી જાય જીભનાં છો કુચ્ચા,
હવે કદી કરું નહીં તારી સાથે બુચ્ચા.
ઈલા:જા જા હવે લુચ્ચા!
ઈટ્ટા ને કિટ્ટાની વાત અલ્યા છોડ:
ભાઈ બહેન કેરી ક્યાંય જોઈ એવી જોડ.
-સુરેશ દલાલ